انٹرنیشنل کرکٹ میں واپسی کے سوال پر شاہد آفریدی کا دلچسپ جواب

عماد، عامر کی ٹیم میں واپسی سے پلئینگ الیون مضبوط ہوئی ہے : سابق کپتان

بدھ 27 مارچ 2024 23:00

لاہور(اُردو پوائنٹ اخبارتازہ ترین - آن لائن۔ 27 مارچ2024ء) سابق کپتان شاہد آفریدی نے آل راونڈر عماد وسیم اور فاسٹ بولر محمد عامر کی انٹرنیشنل کرکٹ سے ریٹائرمنٹ واپس لینے کے بعد اپنی واپسی سے متعلق دلچسپ جواب دیدیا۔ کراچی میں گزشتہ روز میڈیا سے گفتگو کرتے ہوئے سابق ٹیسٹ کرکٹر شاہد آفریدی سے سوال کیا گیا کہ انٹرنیشنل کرکٹ کو خیرباد کہہ دینے والے کھلاڑیوں کی جانب سے فیصلے واپس لینے پر کیا کہیں گی ۔

(جاری ہے)

جس پر انہوں نے جواب دیا کہ اب میرے لیے ریٹائرمنٹ کا اعلان واپس لینا مشکل ہے، ریٹائرمنٹ واپس لینے کا وقت گزر گیا۔ انہوں نے کہا کہ فاسٹ بولر محمد عامر اور آل راونڈر عماد وسیم کا ریٹائرمنٹ واپس لینے کا فیصلہ درست ہے، اگر کوئی کھلاڑی سمجھتا ہے کہ وہ پاکستان کے لیے خدمات سر انجام دے سکتا ہے تو اسے کرکٹ کھیلنی چاہیے۔ شاہد آفریدی نے کہا کہ دونوں کھلاڑیوں کو اپنی فٹنس دکھانے کیلئے ڈومیسٹک کرکٹ میں بھی پرفارم کرنا پڑے گا۔