قطر اوپن ایمچور گالف چیمپئن شپ میں پاکستان کے عمر خالد کی شاندار پرفارمنس

اتوار 21 اپریل 2024 13:35

دو حہ (اُردو پوائنٹ اخبارتازہ ترین - این این آئی۔ 21 اپریل2024ء) قطر اوپن ایمچور گالف چیمپئن شپ میں پاکستان کے عمر خالد نے شاندار پرفارمنس کا مظاہرہ کرتے ہوئے چوتھی پوزیشن حاصل کرلی ہے ، وہ تیسری پوزیشن حاصل کرنے والے آئرش گالفر سے ایک اسٹروک پیچھے رہے۔دوحہ گالف کلب میں ہونے والی چیمپئن شپ میں پاکستان کے گالفر عمر خالد حسین نے تینوں دن شا شاندار کھیل پیش کیا۔

(جاری ہے)

پہلے روز ان کا اسکور تین اوور تھا جبکہ دوسرے روز ان کا اسکور چار اوور رہا، تیسرے روز عمر خالد نے شاندار کم بیک کیا۔ایک موقع پر وہ ٹاپ تین میں آچکے تھے لیکن 10 ویں ہول پر ڈبل بوگی اور پھر آخری ہول پر ایک بوگی کی وجہ سے وہ لیڈرز بورڈ پر آئرلینڈ کے کیتھ کرولی سے ایک اسٹروک پیچھے چلے گئے اور 10 اوور پار کے ساتھ چوتھی پوزیشن حاصل کی۔تیسرے نمبر پر آنے والے گالفر کا اسکور 9 اوور رہا تھا۔قطر اوپن گالف چیمپئن شپ میں تینوں روز 18، 18 ہولز پر 72 پار اسکور کا مقابلہ ہوا تھا۔