سانحہ 9مئی :بانی پی ٹی آئی اور دیگر کیخلاف مقدمے کی سماعت 17 مئی تک ملتوی

پیر 22 اپریل 2024 22:04

اسلام آباد(اُردو پوائنٹ اخبارتازہ ترین - آن لائن۔ 22 اپریل2024ء) اسلام آباد کی انسداد دہشت گری عدالت نے 9 مئی جلاؤ گھیراؤ کیس میں بانی پی ٹی آئی عمران خان سابق رہنما پی ٹی آئی علی نواز اعوان و دیگر کے خلاف مقدمے کی سماعت 17 مئی تک ملتوی کردی۔جج نے ریمارکس دیے کہ یہ میری عدالت کا کیس نہیں ہے، فیصلہ نہیں کرسکتا، قانونی تقاضے پورے کرنے کے بعد بریت کی درخواست دائر کریں،یہ ریمارکس پیرکے روزجج طاہرعباس سپرا نے دیے ہیں۔

کیس کی سماعت انسداد دہشتگری عدالت اسلام آباد کے جج طاہر عباس سپرا نے کی، علی نواز اعوان ، عامر مغل و دیگر اپنے وکیل سردار مصروف ایڈووکیٹ کے ہمراہ عدالت میں پیش ہوئے۔سردار مصروف ایڈووکیٹ نے دلائل دیے کہ اسد عمر تھانہ سنگجانی میں درج مقدمہ سے ڈسچارج ہوچکے ہیں، ہم دیگر ملزمان کی بریت کی درخواست دائر کردیتے ہیں۔

(جاری ہے)

اس پر جج نے ریمارکس دیے کہ یہ میری عدالت کا کیس نہیں ہے، فیصلہ نہیں کرسکتا، قانونی تقاضے پورے کرنے کے بعد بریت کی درخواست دائر کریں، ملزمان میں جب تک نقول تقسیم نہیں ہوتیں اور اس کے بعد چارج فریم نہیں ہوتا تب تک 265 ڈی کی درخواست دائر نہیں کی جاسکتی، ایک بار بریت کی درخواست پر فائنڈنگز آگئیں تو دوسری بار بریت کی درخواست دائر نہیں کی جاسکے گی۔

سردار مصروف ایڈووکیٹ نے کہا کہ تھانہ رمنا میں درج مقدمات میں 40 کے قریب ملزمان ڈسچارج ہوچکے ہیں۔بعد ازاں عدالت نے کیسز کی سماعت 17 مئی تک ملتوی کردی۔