ڈپٹی میئر کراچی سلمان عبداللہ مرادکی صوبائی وزیر تعلیم سید سردار شاہ سے ملاقات

پیر 22 اپریل 2024 22:52

کراچی (اُردو پوائنٹ اخبارتازہ ترین - آن لائن۔ 22 اپریل2024ء) ڈپٹی میئر کراچی سلمان عبداللہ مراد نے کہا ہے کہ صوبائی وزیر سید سردار شاہ نے محکمہ تعلیم میں انقلابی تبدیلیاں کی ہیں جن کی بدولت سندھ حکومت نے بلاتفریق محکمہ تعلیم میں کراچی کے نوجوانوں کی میرٹ پر بھرتیاں کیں اور ضلع ملیر کے تعلیم یافتہ نوجوانوں نے اساتذہ کی بھرتیوں کے لئے آئی بی اے ٹیسٹ میں نمایاں کامیابی حاصل کی، یہ بات انہوں نے صوبائی وزیر تعلیم سید سردار شاہ سے ملاقات کے موقع پر کہی، اس موقع پر پیپلزپارٹی کے اراکین قومی و صوبائی اسمبلی عبدالحکیم بلوچ اور سلیم بلوچ بھی موجود تھے، ملاقات کے دوران ضلع ملیر سے محکمہ تعلیم میں اساتذہ کی بھرتیوں کے حوالے سے تبادلہ خیال کیا گیا، صوبائی وزیر تعلیم سید سردار شاہ نے کہا کہ آئندہ ماہ ضلع ملیر کا دورہ کروں گا اور منتخب نمائندوں سے ملکر ضلع ملیر کے تمام تعلیمی اداروں میں بہتری لائی جائے گی۔