اسپیکر قومی اسمبلی کی ایرانی صدر ابراہیم رئیسی سے ملاقات، پارلیمانی روابط سمیت باہمی دلچسپی کے امورپر تبادلہ خیال

ایرانی صدر کے دورے سے خطے اور دونوں ممالک کے تعلقات پر دور رس نتائج مرتب ہوں گے،سر دار ایاز صادق

پیر 22 اپریل 2024 20:10

اسلام آباد (اُردو پوائنٹ اخبارتازہ ترین - این این آئی۔ 22 اپریل2024ء) اسپیکر قومی اسمبلی ایاز صادق نے ایرانی صدر ڈاکٹر سید ابراہیم رئیسی سے ملاقات کی جس میں پارلیمانی روابط سمیت باہمی دلچسپی کے امور پرتبادلہ خیال کیا گیا۔ اس موقع پر اسپیکر کے ہمراہ ارکان قومی اسمبلی کا ایک وفد بھی موجود تھا۔ اسپیکر قومی اسمبلی ایاز صادق نے کہا کہ ایرانی صدر کے دورے سے خطے اور دونوں ممالک کے تعلقات پر دور رس نتائج مرتب ہوں گے۔

صدر ابراہیم رئیسی نے کہا کہ ایران، پاکستان سے اپنے دیرینہ برادرانہ تعلقات کو بڑی اہمیت دیتا ہے۔ دونوں ممالک کے درمیان قریبی روابط سے خطے میں ترقی اور خوشحالی کے نئے دور کا آغاز ہوگا۔ اسپیکر قومی اسمبلی نے کہا تمام سیاسی جماعتیں ایران سے اپنے تعلقات کو انتہائی قدر کی نگاہ سے دیکھتی ہیں۔

(جاری ہے)

انھوں نے کہا کہ خطے میں امن اور ترقی کے لیے باہمی مسائل کو خوش اسلوبی سے حل کرنا ہو گا۔

تجارت، توانائی اور دیگر شعبوں میں باہمی تعاون کے وسیع مواقع موجود ہیں۔ اسپیکر قومی اسمبلی نے کہا کہ پاک ایران سرحد کے دونوں طرف تجارتی مراکز کا قیام خوش آئند ہے۔ ہمارے تعلقات صرف سفارتی حد تک محدود نہیں۔ ایرانی صدر ڈاکٹر سید ابراہیم رئیسی نے کہا دونوں ممالک اخوت، محبت اور ہمسائیگی کے اٹوٹ رشتوں میں بندھے ہوئے ہیں۔