پاکستان کی امریکا سے درآمدات پرانحصار میں بڑی کمی

مارچ 2024 میں سالانہ بنیادوں پر امریکا سے درآمدات میں 50 فیصد کمی دیکھی گئی، ذرائع

جمعہ 26 اپریل 2024 20:01

اسلام آباد (اُردو پوائنٹ اخبارتازہ ترین - این این آئی۔ 26 اپریل2024ء) رواں مالی سال پاکستان کی امریکا سے درآمدات پر انحصار میں بڑی کمی ریکارڈ کی گئی ہے۔وزارت تجارت کے ذرائع کے مطابق مارچ 2024 میں سالانہ بنیادوں پر امریکا سے درآمدات میں 50 فیصد کمی دیکھی گئی۔وزارت تجارت کے ذرائع نے بتایا کہ مارچ 2024 میں امریکا سے درآمدات کا حجم 8 کروڑ 73 لاکھ ڈالررہا، مارچ 2023 میں امریکا سے درآمدات17 کروڑ47 لاکھ ڈالرتھیں، مارچ میں امریکا کیلئے پاکستانی برآمدات میں سالانہ بنیادوں پر 2.1 فیصدکا اضافہ ریکارڈ کیا گیا۔

ذرائع کے مطابق گزشتہ ماہ امریکا کے لیے پاکستانی برآمدات 43 کروڑ ڈالر رہیں، مارچ 2023 میں امریکا کیلئے پاکستانی برآمدات کا حجم 42 کروڑ 18 لاکھ ڈالر تھا۔ذرائع کے مطابق رواں مالی سال جولائی تا مارچ امریکا سے درآمدات 44 فیصدکم ہوئیں، رواں مالی سال جولائی تا مارچ امریکا سے برآمدات 93 کروڑ 36 لاکھ ڈالرز رہیں جب کہ گزشتہ سال اسی مدت میں امریکا سے درآمدات کا حجم ایک ارب68 کروڑ ڈالرتھا۔

(جاری ہے)

ذرائع نے بتایا کہ رواں مالی سال جولائی تا مارچ امریکا سے برآمدات میں2.5 فیصد کمی ہوئی، رواں مالی سال پہلے 9 ماہ میں امریکا کیلئے برآمدات کا حجم 3 ارب89 کروڑ ڈالر رہا جب کہ گزشتہ سال اسی مدت میں امریکا کیلئے برآمدات 3 ارب 99 کروڑ ڈالر تھیں۔