فلسطینیوں پر اسرائیلی مظالم کیخلاف طلبہ کا احتجاج یونان اور لبنان تک پہنچ گیا

یونان اور لبنان کی جامعات میں بھی طلبہ نے غزہ میں اسرائیلی جارحیت کے خلاف مظاہرہ کیا

بدھ 1 مئی 2024 12:30

بیروت(اُردو پوائنٹ اخبارتازہ ترین - این این آئی۔ 01 مئی2024ء) فلسطینیوں پر اسرائیلی مظالم کے خلاف طلبہ کے احتجاج کا سلسلہ دنیا بھر کی جامعات میں پھیلنے لگا۔امریکا، کینیڈا، فرانس اور آسٹریلیا کی جامعات کے بعد یونان اور لبنان کی جامعات میں بھی طلبہ نے غزہ میں اسرائیلی جارحیت کے خلاف مظاہرہ کیا۔امریکی جامعات میں احتجاج کا سلسلہ تیرہویں روز بھی جاری رہا، کولمبیا یونیورسٹی انتظامیہ نے احتجاج میں شریک طلبہ کو معطل کرنا شروع کردیا۔

(جاری ہے)

کئی جامعات میں پولیس اور طلبہ میں جھڑپیں ہوئیں، ورجینیا، نیو اورلِینز اور آسٹن یونیورسٹی میں 160 سے زیادہ طلبہ گرفتار ہوچکے ہیں۔ 18 اپریل سے جاری احتجاج میں اب تک ایک ہزار سے زیادہ مظاہرین گرفتار کیے جاچکے ہیں، طلبہ کے احتجاج پر فرانس کی علاقائی انتظامیہ نے پیرس کی سائنسز پو یونیورسٹی کی فنڈنگ روک دی۔ وہیں مقبوضہ مغربی کنارے کے علاقے رام اللہ کی بیر زیت یونیورسٹی میں جرمن سفیر کی آمد پر طلبہ نے احتجاج کیا جس کے باعث جرمن سفیر کو دورہ ادھورا چھوڑ کر واپس جانا پڑا۔