صوبائی وزرا صحت کی ڈی ایچ اوز ،ڈی ڈی ایس آرز کے تربیتی سیشن میں شرکت

لاہور (اُردو پوائنٹ اخبارتازہ ترین - اے پی پی۔ 14 مئی2024ء) صوبائی وزرا صحت خواجہ سلمان رفیق اور خواجہ عمران نذیرنے مقامی ہوٹل میں ڈی ایچ اوز اور ڈی ڈی ایس آرز کے تربیتی سیشن میں بطور مہمانان خصوصی شرکت کی۔صوبائی وزیر خواجہ سلمان رفیق نے شرکا سے خطاب کرتے ہوئے کہا کہ کورونا وائرس نے پوری دنیا کی معیشت کو بہت بری طرح متاثر کیا تھا،ایسی خطرناک بیماریوں سے عوام کو بچانے کےلئے ڈاکٹرزکی تربیت ضروری ہے اورہمارے ہیلتھ کیئر ورکرز کو ہر بیماری اور علاج بارے پوری آگاہی ہونی چاہیئے۔

انہوں نے کہا کہ وزیر اعلیٰ پنجاب کی قیادت میں نظام صحت کی بہتری کےلئے محنت کر رہے ہیں۔ خدمت انسانیت سے دنیا و آخرت سنواری جا سکتی ہے۔انہوں نے کہا کہ 2011 میں شہباز شریف کی قیادت میں پوری دنیا کو ڈینگی پر قابو پا کر دیکھایا تھا، اللہ تعالی کے کرم سے وفاق اورصوبہ پنجاب میں عوام کی خدمت کر رہے ہیں تا کہ انسانیت کا بھلا ہو۔

(جاری ہے)

انہوں نے کہا کہ حکومت نے ایم ایس حضرات کی تعیناتی سو فیصد میرٹ پر کی ہے،ہمیں ہمیشہ رزلٹ اریئنٹڈ ہونا چاہیئے۔

صوبائی وزیر خواجہ عمران نذیر نے اپنے خطاب میں کہا کہ محکمہ صحت کے نظام کو مل جل کر ٹھیک کریں گے،ڈاکٹرز مسیحا ہیں جو انسانیت کی خدمت کرکے دنیا اور آخرت سنوار رہے ہیں ،ڈاکٹرز کی ٹریننگ سے ان میں لیڈرشپ کوالٹی پیدا کی جارہی ہیں اور ڈونرز ہماری تربیت کرکے ہماری ٹیکنیکل اور پیشہ ورانہ کپیسٹی بڑھا رہے ہیں ،ہمیں انسانیت کی خدمت کے لئے اپنا مزاج بدلنا ہوگا۔

انہوں نے برٹش ہائی کمیشن، ڈبلیو ایچ او دیگر پارٹنرزکا تکینکی معاونت فراہم کرنے پر شکریہ ادا کیا۔اس موقع پر ڈی جی ہیلتھ سروسز ڈاکٹر الیاس گوندل، ڈائریکٹر سی ڈی سی ڈاکٹر یداللہ، یوکے ہیلتھ سکیورٹی ایجنسی کے ڈاکٹر ذیشان، عالمی ادارہ صحت کے ڈاکٹر احمد شفیق، ڈاکٹر سرتاج، ڈاکٹر جنید، نیشنل انسٹی ٹیوٹ آف ہیلتھ کے ڈاکٹر سلمان، ڈاکٹر سعید اختر اور ڈی ایچ اوز اور ڈی ڈی ایس آرز نے شرکت کی۔