سوشل میڈیا پر’نیٹ میٹرنگ ‘کے حوالے سے چلنے والی خبروں میں کوئی صداقت نہیں،لیسکو

بدھ 15 مئی 2024 18:31

لاہور (اُردو پوائنٹ اخبارتازہ ترین - اے پی پی۔ 15 مئی2024ء) لیسکو نے کہا ہے کہ سوشل میڈیا پر’ نیٹ میٹرنگ ‘کے حوالے سے چلنے والی خبروں میں کوئی صداقت نہیں ہے۔بدھ کو ترجمان لیسکو کی جانب سے جاری ہونیوالے بیان کے مطابق سوشل میڈیا پر’ نیٹ میٹرنگ ‘کے حوالے سے چلنے والی خبروں میں کوئی صداقت نہیں،نیٹ میٹر لگوانے کا طریقہ کار نہایت سادہ اور شفاف ہے،جس میں کرپشن کی کوئی گنجائش موجود نہیں ہے۔

لیسکو نیٹ میٹر کے حوالے سے صرف این او سی جاری کرتا ہے،صارفین نیٹ میٹرکسی بھی منظور شدہ کمپنی سے خرید سکتے ہیں۔

(جاری ہے)

لیسکوانسٹالیشن فیس،نام کی تبدیلی اور ایکسٹینشن آف لوڈ کے علاوہ کوئی چارجز وصول نہیں کرتا،نام کی تبدیلی اور ایکسٹینشن آف لوڈ کے لئے گھریلو صارفین سے1220روپے فی کلو واٹ جبکہ کمرشل صارفین کے لیے 1810 روپے فی کلو واٹ وصول کیے جاتے ہیں۔

اگر کوئی پرائیویٹ کمپنی اضافی چارجز وصول کر رہی ہے تو اس کا لیسکو سے کوئی تعلق نہیں۔ترجمان لیسکو کا کہنا تھا کہ 5 سے 25 کے وی کے کنکشن کے لیے نیپرا لائسنس کی ضرورت نہیں ہے، 25 کے وی تک کے کنکشن کیلئے متعلقہ سب ڈویژن یا ڈویژن میں درخواست دی جا سکتی ہے،کسی بھی قسم کی شکایت کی صورت میں متعلقہ ایس ای یا ایکسیئن سے رابطہ کیا جا سکتا ہے۔