کراچی: کم عمر لڑکی کا اغوا و زیادتی: مجرم کو عمر قید و جرمانے کی سزا

جمعرات 16 مئی 2024 22:00

کراچی(اُردو پوائنٹ اخبارتازہ ترین - این این آئی۔ 16 مئی2024ء) کراچی کی مقامی عدالت نے کم عمر لڑکی کے اغوا اور زیادتی کے کیس میں جرم ثابت ہونے پر ملزم کو عمر قید اور پچاس ہزار روپے جرمانے کی سزا سنادی۔جمعرات کوایڈیشنل ڈسٹرکٹ اینڈسیشن جج جنوبی کی عدالت میں کیس کی سماعت ہوئی۔ متاثرہ لڑکی کے مطابق اسے والد نے مدرسے کے باہر چھوڑا، وہ مدرسے کے باہر چیز کی دکان پر چلی گئی،جہاں ملزم اسے زبردستی اغوا کر کے کوئٹہ لے گیا۔

لڑکی کے مطابق وہاں اسے 20 سے زائد دن تک رکھا گیا اور اس کے ساتھ زیادتی کی گئی۔ عدالت نے کہاکہ زبردستی اغوا کا عنصر نظر نہیں آ رہا۔ کراچی سے کوئٹہ تک راستے میں ملنے والی پولیس کے سامنے بھی لڑکی خاموش رہی۔ جبکہ ملزم پر اسلحہ کے زور پر یا نشہ آور ادویات کے ذریعے اغوا کرنے کا الزام نہیں لگایا گیا۔

(جاری ہے)

زبردستی اغوا کا الزام مسترد کیا جاتا ہے۔

عدالت کے مطابق ملزم نے دوران ٹرائل اپنے بیان میں کہا کہ اس نے اسلام قبول کرکے متاثرہ لڑکی سے شادی کی۔ عدالت نے کہا کہ ملزم اسلام قبول کرنے کی سند یا نکاح نامہ پیش کرنے میں ناکام رہا، لہذا زیادتی کا مرتکب ہوا ہے۔ پولیس کے مطابق ملزم کو خفیہ اطلاع پر کارروائی کرتے ہوئے گرفتار کر کے لڑکی کو بازیاب کر وایا، ملزم کے خلاف تھانہ بلوچ کالونی میں مقدمہ درج کیا گیا تھا۔