ریسکیو 1122 اٹک نے ممکنہ سیلاب میں بچائو کے حوالے سے دیگر اداروں کے ساتھ مل کر فرضی مشقوں کا انعقاد

ًاٹک (اُردو پوائنٹ اخبارتازہ ترین - آن لائن۔ 17 مئی2024ء) ریسکیو 1122 اٹک نے ممکنہ سیلاب میں بچائو کے حوالے سے دیگر اداروں کے ساتھ مل کر فرضی مشقوں کا انعقاد کیا ، ریسکیو 1122 اٹک نے دریائے سندھ میں شادی خان کے مقام پر ممکنہ سیلاب سے بچاؤ کے حوالے سے دیگر اداروں کی استعداد کار کو جانچنے کے لیے فرضی مشقوں کا انعقاد کیا جس میں ریسکیو 1122کے ساتھ سول ڈیفنس، محکمہ لائف سٹاک، بلڈنگ ڈیپارٹمنٹ، ٹریفک پولیس، میونسپل کمیٹی حضرو، آل برادرز ایمبولینس سروس، سویرا ویلفئیر سوسائٹی اور دیگر متعلقہ اداروں نے حصہ لیا، اس موقع پر کشتی رانی، ڈوبتے ہوئے افراد کو بچانے کی مشقوں سمیت میڈیکل فرسٹ ایڈ،تیراکی اور غوطہ خوری جیسی عملی مشقوں کا بہترین مظاہرہ کیا، ڈسٹرکٹ ایمرجینسی آفیسر علی حسین نے تقریب کے مہمان خصوصی ڈپٹی کمشنر رائو عاطف اور اسسٹنٹ کمشنر حضرو کامران اشرف کا پرتپاک استقبال کیا جس کے بعد علی حسین نے ڈپٹی کمشنر کو ریسکیو 1122کے ہنگامی صورت حال میں استعمال ہونے والے آلات کا معائنہ کروایا اور تفصیلات سے آگاہ کرتے ہوئے بتایا کہ متعلقہ اداروں کے مابین مضبوط ربط اور بروقت ر سپا نس کی مدد سے کسی بھی سیلابی صورتحال میں قیمتی جانوں کے ضیاع سے بچایا جاسکتا ہے، مزید براں انہوں نے کہا کہ ریسکیو1122 اٹک مون سون کے دوران کسی بھی سیلابی صورت حال سے نبرد آزما ہونے کیلئے 24 گھنٹے الرٹ رہے گی اور کسی بھی ایمرجنسی صورتحال میں عوام کی جان و مال کے تحفظ کو یقینی بنائیں گی، ڈپٹی کمشنر رائو عاطف نے فرضی مشقوں کا معائنہ کیا اور کہا کہ اس طرح کی فرضی مشقیں اداروں کے مابین ایک مظبوط ہم آہنگی پیدا کرتی ہیں جس سے سیلاب سے بچائو کی پیشگی تیاری اور قیمتی جانوں کے ضیاع کو روکا جاسکتا ہے، بعد ازاں انہوں نے ریسکیو اٹک کی سیلاب سے بچائو کی تیاری پر اعتماد کا اظہار کیا اور کہا کہ تمام متعلقہ محکمے کوارڈینیشن میٹنگ جاری رکھیں تاکہ آنے والے مون سون سیزن میں بہتر حکمت عملی سے نبرد آزما ہوا جا سکے۔