ایران، 2 خواتین سمیت 7 افراد کو پھانسی دے دی گئی

تہران(اُردو پوائنٹ اخبارتازہ ترین - این این آئی۔ 19 مئی2024ء) ایران میں 2 خواتین سمیت 7 افراد کو پھانسی دے دی گئی۔غیرملکی خبررساں ادارے کے مطابق ناروے میں قائم ایران ہیومن رائٹس نے ایک بیان میں کہا کہ دو بالغ بچوں کی ماں 53 سالہ پروین موسوی کو ایران کی ارمیا جیل میں منشیات سے متعلق مختلف مقدمات میں سزا یافتہ 5 افراد کے ساتھ پھانسی دی گئی۔مشرقی ایران کے شہر نیشاپور میں 27 سالہ خاتون فاطمہ عبداللہی کو شوہر کے قتل کے الزام میں پھانسی دی گئی۔

(جاری ہے)

بیان میں مزید کہا گیا کہ ایران میں اس سال کم از کم 223 افراد کو پھانسی دی گئی جن میں سے کم از کم 50 پھانسیاں صرف مئی میں دی گئیں۔رپورٹ میں بتایا گیا کہ اپریل میں نئے ایرانی سال کے اختتام اور رمضان کی چھٹیوں کے بعد نیا رجحان شروع ہوا اور اب تک 6 خواتین سمیت 115 افراد کو پھانسی دی جا چکی ہے۔ایران میں کسی بھی دوسرے ملک کے مقابلے میں خواتین کو زیادہ سزائے موت دی جاتی ہے۔سزائے موت کے خلاف سرگرم کارکنوں کا کہنا تھاکہ جن خواتین کو پھانسی دی گئی ان میں بہت سی خواتین کی زبردستی شادی کروائی گئی یا وہ گھریلو تشدد کا شکار بنیں۔غیر سرکاری تنظیموں کے مطابق ایران میں 2015 کے بعد سے کسی بھی سال کے مقابلے میں گزشتہ سال سب سے زیادہ پھانسیاں دی گئیں۔