ہوم اکنامکس یونیورسٹی میں کمپیوٹنگ فیسٹیول کا انعقاد، 12 یونیورسٹیوں کے 105 طلباء کی شرکت

جمعہ 10 جنوری 2025 23:40

لاہور (اُردو پوائنٹ اخبارتازہ ترین - آن لائن۔ 10 جنوری2025ء)یونیورسٹی آف ہوم اکنامکس کے شعبہ کمپیوٹر سائنس اینڈ انفارمیشن ٹیکنالوجی نے کمپیوٹنگ فیسٹیول 2025 کا کامیاب انعقاد کیا، جس میں 12 ممتاز جامعات کے طلباء نے شرکت کی۔ یہ فیسٹیول طلباء کو اپنی صلاحیتوں کے اظہار اور جدید ٹیکنالوجی کے شعبے میں جدت طرازی کا موقع فراہم کرنے کے لیے منعقد کیا گیا تھا۔

اس فیسٹیول میں لمز، یو ای ٹی، پنجاب یونیورسٹی، یو ایم ٹی، یونیورسٹی آف سنٹرل پنجاب، پنجاب تیانجن یونیورسٹی آف ٹیکنالوجی، لاہور گیریژن یونیورسٹی، سپیریئر یونیورسٹی، کنیرڈ کالج اور نیشنل انسٹیٹیوٹ آف انفارمیشن ٹیکنالوجی سے 105 طلباء نے شرکت کی۔ مقابلے میں چار مختلف کیٹیگریز شامل تھیں جن میں کوڈنگ، مصنوعی ذہانت کے پرامپٹس، اور لوگو ڈیزائن شامل تھے۔

(جاری ہے)

ایونٹ کی نگرانی کے فرائض شعبہ کی انچارج ڈاکٹر عنیقہ اور ثمین فاطمہ نے انجام دیے۔ وائس چانسلر پروفیسر ڈاکٹر فلیحہ زہرا کاظمی نے کہا کہا کہ یہ فیسٹیول نہ صرف طلباء کو اپنی صلاحیتوں کے اظہار کا موقع فراہم کرتا ہے بلکہ ٹیکنالوجی کی ترقی کو فروغ دینے کے لیے ایک مشترکہ پلیٹ فارم بھی مہیا کرتا ہے۔ انہوں نے کہا، "ہمیں فخر ہے کہ ہم نے اس فیسٹیول میں 12 جامعات کو مدعو کیا، جس سے یہ جدت اور ٹیلنٹ کے تبادلے کا مرکز بن گیا ہے۔" طلباء کی کوششوں اور شرکت کو سراہتے ہوئے، ہوم اکنامکس یونیورسٹی نے 105 طلباء میں تعریفی اسناد تقسیم کیں۔ اختتامی تقریب میں ڈاکٹر طیبہ سہیل، ڈائریکٹر اکیڈمکس، اور ڈاکٹر ارم رباب، ڈائریکٹر اسٹوڈنٹ افیئرز نے بھی شرکت کی۔