ہائرایجوکیشن کمیشن نے پاکستان کے اعلیٰ تعلیمی اداروں کے لیے ایک جدید اور جامع ڈیٹا سسٹم ہیڈز پلیٹ فارم لانچ کر دیا

بدھ 29 اپریل 2026 20:18

اسلام آباد (اُردو پوائنٹ اخبارتازہ ترین - اے پی پی۔ 29 اپریل2026ء) ہائر ایجوکیشن کمیشن (ایچ ای سی) نے پاکستان کے اعلیٰ تعلیمی اداروں کے لیے ایک جدید اور جامع ڈیٹا سسٹم ہیڈز پلیٹ فارم (Higher Education Analytics & Data Services - HEADS) لانچ کر دیا ہے جو ملک کا پہلا قومی ڈیٹا ویئر ہائوس اور سیلف سروس بزنس انٹیلی جنس پلیٹ فارم ہے۔ یہ پلیٹ فارم ایچ ای سی کلائوڈ پر ہوسٹ کیا جائے گا۔

(جاری ہے)

یہ منصوبہ ہائر ایجوکیشن ڈویلپمنٹ پراجیکٹ کے تحت تیار کیا گیا ہے جس کا مقصد جامعات اور ایچ ای سی کے مختلف شعبہ جات سے حاصل ہونے والے ڈیٹا کو ایک متحدہ قومی نظام میں یکجا کرنا ہے۔ اس پلیٹ فارم کے ذریعے ڈیش بورڈز، بینچ مارکنگ، تجزیات اور شواہد پر مبنی فیصلہ سازی کو فروغ دیا جائے گا۔ ایچ ای سی نے اس منصوبے کے نفاذ کے لیے ہواوے پاکستان کے ساتھ اس کے پارٹنر ایم/ایس کامٹیل کے ذریعے باضابطہ معاہدہ بھی کر لیا ہے۔

اس معاہدے کے تحت منصوبے کے عملی نفاذ کا آغاز کیا جائے گا۔ حکام کے مطابق یہ اقدام اعلیٰ تعلیم کے شعبے میں شفاف طرز حکمرانی، کارکردگی کی موثر نگرانی اور ڈیٹا پر مبنی منصوبہ بندی کو مضبوط بنانے میں اہم کردار ادا کرے گا جس سے پاکستان کے تعلیمی نظام کو جدید تقاضوں سے ہم آہنگ کیا جا سکے گا۔