فیصل آباد،گندم کی کٹائی کے بعد زمین کو نقصان سے بچانے اور اراضی کو نئی فصل کی کاشت کےلئے تیارکرنے کی غرض سے سفارشات جاری

منگل 15 اپریل 2025 16:31

فیصل آباد (اُردو پوائنٹ اخبارتازہ ترین - اے پی پی۔ 15 اپریل2025ء) گندم کے کاشتکاروں، کسانوں، زمینداروں کو ہدایت کی گئی ہے کہ ماحولیاتی آلودگی، زیر زمین مفید حشرات کو مرنے سے بچانے، ز مینی درجہ حرارت میں اضافہ کے باعث نامیاتی مادوں کا ضیاع روکنے کیلئے اچھی طرح خشک ہونے اور پکنے پر گندم کی کٹائی کے بعد ناڑ کو آگ لگانے سے گریز کریں اور اراضی کو نئی فصل کی کاشت کیلئے تیا رکرنے کی غرض سے ویٹ سٹرا چاپر کو استعمال میں لائیں جو کمبائن ہارویسٹر کے استعمال کے بعد ناڑ کو اکٹھا کر کے بھوسہ بنانے کے بعد ٹرالی میں منتقل کر دیتی ہے۔

گندم کے کاشتکاروں کی آگاہی کےلئے ویٹ ریسرچ انسٹیٹیوٹ کے ماہرین زراعت نے کہاکہ فیصل آباد، ڈسکہ، حافظ آباد، اوکاڑہ، میاں چنوں، ملتان اور پنجاب کے کئی دیگر اضلاع میں ویٹ سٹرا چاپر ز کے مقامی انڈسٹری کے توسط سے کرایہ پر فراہمی کیلئے بھی اقدامات کئے گئے ہیں۔

(جاری ہے)

انہوں نے کہا کہ کاشتکار کمبائن ہار ویسٹر ز سے گندم برداشت کرنے کے بعد ویٹ سٹرا چاپر کے استعمال سے بھوسہ حاصل کر سکتے ہیں۔

انہوں نے کہا کہ ہارویسٹر کے استعمال سے گندم کی کٹائی وگہائی کے دوران نقصان کی بچت کے علاوہ 15فیصد سے زائد اضافی پیداوار بھی حاصل ہوتی ہے اور ناڑ کو آگ لگانے سے بچا یاجا سکتا ہے۔ انہوں نے مزید بتایا کہ محکمہ زراعت پنجاب نے اس ضمن میں ایک فری ہیلپ لائن17000۔0800 بھی قائم کررکھی ہے لہٰذا کاشتکار صبح 8تا رات8بجے تک فری ہیلپ لائن پر بھی رابطہ کر سکتے ہیں۔