ضلعی امن کمیٹی سیالکوٹ کا اجلاس، محرم الحرام کے دوران قیامِ امن کیلئے مشترکہ حکمت عملی پر زور

ہفتہ 14 جون 2025 21:44

سیالکوٹ (اُردو پوائنٹ اخبارتازہ ترین - اے پی پی۔ 14 جون2025ء) ڈپٹی کمشنر سیالکوٹ صبا اصغر علی اور ڈسٹرکٹ پولیس آفیسر(ڈی پی او)فیصل شہزاد کی زیر صدارت ڈسٹرکٹ امن کمیٹی سیالکوٹ کا اہم اجلاس ڈی سی آفس کانفرنس روم میں منعقد ہوا۔ اجلاس میں محرم الحرام کے دوران امن و امان کی صورتحال اور انتظامی امور کا تفصیلی جائزہ لیا گیا۔ڈپٹی کمشنر اور ڈی پی او سیالکوٹ نے اپنے خطاب میں کہا کہ محرم الحرام کے دوران امن قائم رکھنا صرف پولیس اور انتظامیہ ہی نہیں بلکہ تمام مکاتب فکر کے علماء کرام اور امن کمیٹی کے اراکین کی بھی مشترکہ ذمہ داری ہے۔

انہوں نے کہا کہ امن کمیٹی کے ممبران اللہ کی رضا کے لیے بلا معاوضہ جو خدمات سرانجام دے رہے ہیں وہ لائق تحسین ہیں۔ ان کی رائے اور مشاورت سے کیے گئے فیصلوں پر مکمل عملدرآمد یقینی بنایا جائے گا۔

(جاری ہے)

انہوں نے مزید کہا کہ امت مسلمہ ایک نازک دور سے گزر رہی ہے، ایسے میں بین المسالک ہم آہنگی، اتحاد و اتفاق وقت کی اہم ضرورت ہے۔ تمام مذہبی و سماجی قائدین ذاتی و گروہی مفادات کو بالائے طاق رکھتے ہوئے پائیدار امن کے لیے اپنا کردار ادا کریں۔

اجلاس سے کوآرڈینیٹر ضلعی امن کمیٹی حافظ اصغر علی چیمہ، مفتی کفایت اللہ شاکر، علامہ ایوب خان، قاری اقبال گھمن، ظفر عباس، ایوب اوپل، نجم گیلانی اور حافظ نیاز احمد الازہری نے بھی اظہار خیال کیا۔اجلاس میں اسسٹنٹ کمشنر سیالکوٹ انعم بابر، اے سی ڈسکہ عثمان غنی، اے سی پسرور سدرہ ستار، انچارج سکیورٹی برانچ حافظ سعید، سی او میونسپل کارپوریشن ملک اعجازاور سی ایس ڈبلیو ایم سی کاشف نواز رندھاوا سمیت تمام متعلقہ اداروں کے افسران نے شرکت کی۔