محکمہ موسمیات کی جانب سے 5 تا 7 اکتوبر طوفانی بارشوں کی پیش گوئی

ہفتہ 4 اکتوبر 2025 22:31

راولپنڈی (اُردو پوائنٹ اخبارتازہ ترین - آن لائن۔ 04 اکتوبر2025ء) کمشنر راولپنڈی ڈویژن انجینئر عامر خٹک نے ہدایت کی ہے کہ نکاسی آب اور ڈرینج سسٹم کی بہتری کے لئے واسا اور میونسپل اداروں کو بارشوں کے دوران خصوصی اقدامات کئے جائیں محکمہ موسمیات کی جانب سے 5 تا 7 اکتوبر طوفانی بارشوں کی پیشن گوئی پر سول ڈیفنس کا ایمرجنسی پلان فعال رکھا جائے تاکہ کسی بھی ہنگامی صورتحال میں فوری کاروائی ممکن ہو سکے۔

(جاری ہے)

ان خیالات کا اظہار انہوں نے کمشنر آفس راولپنڈی میں منعقدہ ڈویژنل کوآرڈینیشن کمیٹی کے اجلاس میں کیا اجلاس میں ڈائریکٹر ڈویلپمنٹ زینیا خان، ڈائریکٹر لوکل گورنمنٹ سبطین کاظمی، سی او راولپنڈی ویسٹ مینجمنٹ کمپنی (RWMC) اور دیگر متعلقہ اداروں کے افسران و سربراہان نے شرکت کی کمشنر نے کہا کہ وہ تجاوزات کے جائزہ کے حوالے سے آئندہ ہفتے راجہ بازار اور کمرشل مارکیٹ کا تفصیلی دورہ کریں گے اور وہاں پر تجاوزات کے خاتمے کے علاوہ جاری ترقیاتی کاموں، صفائی ستھرائی، ٹریفک مینجمنٹ کا جائزہ لیا جائے گا کمشنر نے تمام ڈپٹی کمشنرز کو ہدایت کی کہ ڈویژن کے داخلی و خارجی راستوں پر فوڈ ڈیپارٹمنٹ کی چیک پوسٹس فعال کریں اور متعلقہ اسسٹنٹ کمشنرز ڈیوٹی روسٹر کے مطابق وہاں پر تمام محکموں کی حاضری یقینی بنائیں علاوہ ازیں کمشنر نے تمام محکموں کو ہدایت دی کہ شہر کی خوبصورتی، ٹریفک کی روانی اور ماحولیات کی بہتری کے لئے مربوط حکمت عملی اختیار کی جائے انہوں نے کہا کہ عوامی سہولت کے منصوبے ترجیحی بنیادوں پر مکمل کئے جائیں اور ہر محکمے کا فوکل پرسن اپنی کارکردگی کی رپورٹ باقاعدگی سے پیش کرے۔