پنجاب میں 23 اگست تک بارشوں اور بڑے شہروں میں اربن فلڈنگ کا خدشہ

لاہور(اُردو پوائنٹ اخبارتازہ ترین - این این آئی۔ 22 اگست2026ء) پنجاب کے بیشتر اضلاع میں 23 اگست تک بارشوں کی پیشگوئی کردی گئی ہے۔ترجمان پی ڈی ایم اے کے مطابق آئندہ 24 گھنٹوں میں بھی بیشتر اضلاع میں مون سون بارشیں ہوں گی، جبکہ لاہور سمیت پنجاب بھر میں بارش برسانے والا سسٹم موجود ہے۔گزشتہ 24 گھنٹوں میں پنجاب کے مختلف اضلاع میں بارش ریکارڈ کی گئی۔

سیالکوٹ میں سب سے زیادہ 87 ملی میٹر، جبکہ مری اور نارووال میں 53، 53 ملی میٹر بارش ریکارڈ ہوئی، راولپنڈی میں 21، گجرات میں 24 اور گجرانوالہ میں 3 ملی میٹر بارش ریکارڈ کی گئی۔ اسی طرح منگلا میں 7 جبکہ اٹک میں ایک ملی میٹر بارش ریکارڈ ہوئی۔پی ڈی ایم اے کے مطابق راولپنڈی، اٹک، چکوال، جہلم، گجرانوالہ، سیالکوٹ، نارووال، گجرات اور منڈی بہائوالدین میں مزید بارشوں کی پیشگوئی ہے جبکہ لاہور، سرگودھا، فیصل آباد، جھنگ، ٹوبہ ٹیک سنگھ، ساہیوال اور اوکاڑہ میں بھی موسلادھار بارش کا امکان ہے۔

(جاری ہے)

اس دوران بھکر، لیہ، ڈیرہ غازی خان، ملتان، بہاولپور، بہاولنگر اور رحیم یار خان میں بھی بارش متوقع ہے،پی ڈی ایم اے پنجاب نے لاہور، گوجرانوالہ، سیالکوٹ اور نارووال میں اربن فلڈنگ کا خدشہ ظاہر کیا ہے۔ڈی جی پی ڈی ایم اے سیف انور جپہ نے کہا کہ مری، گلیات اور پہاڑی علاقوں میں لینڈ سلائیڈنگ کا خطرہ ہے، جبکہ برساتی نالوں میں فلیش فلڈنگ بھی ہوسکتی ہے۔

وزیراعلی پنجاب کی ہدایت پر ضلعی انتظامیہ کو الرٹ جاری کردیا گیا ہے۔سیف انور جپہ نے کہا کہ بڑے شہروں میں مون سون بارشوں کے باعث اربن فلڈنگ کے پیش نظر انتظامیہ پیشگی الرٹ رہے۔ محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک کو بھی الرٹ جاری کردیا گیا ہے۔ڈی جی پی ڈی ایم اے نے شہریوں سے خراب موسم میں احتیاطی تدابیر اختیار کرنے کی اپیل کی۔

انہوں نے کہا کہ بوسیدہ اور کچے مکانات میں ہرگز رہائش نہ رکھی جائے، کیونکہ مون سون میں ایسے مکانات گرنے سے زیادہ اموات رپورٹ ہوئی ہیں۔سیف انور جپہ نے کہا کہ آندھی اور طوفان کے دوران محفوظ مقامات پر رہیں اور غیر ضروری سفر سے گریز کریں۔ شہری آسمانی بجلی سے بچا کے لیے محفوظ مقامات پر رہیں اور بجلی کی گرج چمک میں کھلے آسمان تلے ہرگز نہ جائیں۔

انہوں نے کہا کہ بچوں کا خاص خیال رکھا جائے اور انہیں نشیبی علاقوں میں جمع پانی، بجلی کی تاروں اور کھمبوں کے قریب ہرگز نہ جانے دیا جائے۔ ایمرجنسی صورتحال میں شہری پی ڈی ایم اے کی ہیلپ لائن 1129 پر رابطہ کرسکتے ہیں۔دوسری جانب محکمہ موسمیات نے بتایا کہ لاہور میں بارش کا سسٹم کمزور ہونے کے باعث درجہ حرارت بڑھ رہا ہے اور گرمی میں اضافہ ہورہا ہے۔

لاہور میں آج شام ہلکی بارش، جبکہ کل صبح بھی بارش کا امکان ہے۔محکمہ موسمیات کے مطابق ڈیرہ اسماعیل خان کی جانب سے آنے والا نیا سسٹم رات کے وقت فیصل آباد اور سرگودھا کے علاقوں میں بارش برسا سکتا ہے۔ لاہور میں کم سے کم درجہ حرارت 28 جبکہ زیادہ سے زیادہ 37 ڈگری سینٹی گریڈ تک جانے کا امکان ہے۔محکمہ موسمیات نے بتایا کہ لاہور میں بارشوں میں کمی کے باعث درجہ حرارت اور گرمی بڑھ رہی ہے۔ تاہم مون سون بارشوں کا موجودہ سلسلہ آئندہ 24 گھنٹوں تک جاری رہنے کا امکان ہے۔