پنجاب میں تعلیمی بورڈز کے انٹرمیڈیٹ پارٹ ون کے نتائج کا اعلان

لاہور بورڈ کی طرف سے جاری کردہ نتائج میں طلباء کی کامیابی کا تناسب 53 اعشاریہ 77 فیصد رہا

ساجد علی بدھ 15 اکتوبر 2025 11:50

پنجاب میں تعلیمی بورڈز کے انٹرمیڈیٹ پارٹ ون کے نتائج کا اعلان

لاہور ( اُردو پوائنٹ اخبارتازہ ترین۔ 15 اکتوبر2025ء ) صوبہپنجاب بھر کے تعلیمی بورڈز کی جانب سے انٹرمیڈیٹ پارٹ ون کے نتائج کا اعلان کر دیا گیا۔ تفصیلات کے مطابق پنجاب کے تمام بورڈز آف انٹرمیڈیٹ اینڈ سیکنڈری ایجوکیشن نے فرسٹ ایئر (گیارہویں جماعت) کے سال 2025ء کے سالانہ امتحانات کے نتائج جاری کر دیئے ہیں، لاہور بورڈ کے جاری کردہ نتائج میں کامیابی کا تناسب 53 اعشاریہ 77 فیصد رہا جہاں امتحانات میں ایک لاکھ 72 ہزار 100 امیدواروں نے شرکت کی اور 92 ہزار 541 طلبا ء کامیاب قرار پائے۔

بتایا گیا ہے کہ لاہور بورڈ میں پری میڈیکل گروپ میں کامیابی کا تناسب 64.30 فیصد، پری انجینئرنگ گروپ میں کامیابی کا تناسب 73.36 فیصد اور جنرل سائنس گروپ میں کامیابی کا تناسب 57.99 فیصد، کامرس گروپ میں کامیابی کا تناسب 50.11 فیصد جبکہ آرٹس گروپ میں کامیابی کا تناسب 40.05 فیصد رہا۔

(جاری ہے)

معلوم ہوا ہے کہ سرگودھا کے تعلیمی بورڈ نے بھی انٹر میڈیٹ پارٹ ون کے نتائج کا اعلان کردیا ہے یہاں سال 2025ء کے امتحانات میں کل 54 ہزار 831 امیدوار شریک ہوئے، جن مین سے 31ہزار 278 امیدوار کامیاب قرار پائے اور کامیابی کا تناسب 57.04فیصد رہا، اسی طرح فیصل آباد تعلیمی بورڈ کی جانب سے بھی انٹرمیڈیٹ نتائج پارٹ ون کے نتائج کا اعلان کیا گیا ہے جہاں امتحانات میں 44 فیصد امیدوار فیل ہوگئے۔

بتایا جارہا ہے کہ فیصل آباد میں انٹرمیڈیٹ پارٹ ون میں کامیابی کا تناسب 55.74 فیصد رہا،امتحان میں کل 1 لاکھ 08ہزار 182 طلبا و طابات نے شرکت کی جن میں سے 60 ہزار 302 طلبہ کامیاب ہوئے، بہاولپور بورڈ نے بھی انٹرمیڈیٹ پارٹ ون (گیارہویں) جماعت کے نتائج کا اعلان کر دیا ہے جہاں انٹرمیڈیٹ پارٹ ون کے امتحانات میں کل 57ہزار 720 امیدواران نے شرکت کی اور نتائج کا مجموعی تناسب 53.17 رہا۔