کسان گندم کی بوائی آئندہ دو ہفتوں تک مکمل کر لیں، ڈائریکٹر زراعت توسیع گوجرانولہ

جمعہ 14 نومبر 2025 16:45

سیالکوٹ (اُردو پوائنٹ اخبارتازہ ترین - اے پی پی۔ 14 نومبر2025ء) محکمہ زراعت نے کسانوں کو گندم کی بوائی آئندہ دو ہفتوں تک مکمل کرنے کی ہدایت کی ہے۔ ڈائریکٹر زراعت توسیع گوجرانولہ ڈاکٹر شکیل احمد نے پسرور میں محکمہ زراعت (توسیع) سیالکوٹ اور فاطمہ فرٹیلائزرز کمپنی کے اشتراک سے منعقدہ ’’سر سبز گندم کنونشن‘‘ سے خطاب کرتے ہوئے کہا کہ کسان گندم کی بوائی آئندہ دو ہفتوں تک مکمل کرلیں ، دسمبر میں موسم گندم کی کاشت کے لئے زیادہ سازگار نہیں ہو گا۔

ڈائریکٹر زراعت توسیع گوجرانولہ نے کہا کہ گندم کی فی ایکڑ پیداوار بڑھانے کے لئے کاشتکار دلکش 20، اکبر 19، فخر بھکر، فخر بھکر سٹار اور دیگر گندم کی منظور شدہ اقسام کا بیج استعمال کریں تاکہ وزیر اعلی مریم نواز شریف کے ویژن کے مطابق سیالکوٹ میں 4 لاکھ اور 81 ہزار ایکڑ رقبہ پر گندم کی کاشت کا ہدف حاصل کیا جا سکے۔

(جاری ہے)

ڈپٹی ڈائریکٹر زراعت توسیع سیالکوٹ سجاد حیدر نے کہا کہ کاشتکار کھاد کی مقدار مقرر کردہ تناسب سے استعمال کریں اور محکمہ زراعت کی منظور کردہ کسی بھی کھاد کو اس کے شیڈول کے مطابق نظر انداز نہ کریں۔

انہوں نے کہا کہ اگر وقتی طور پر اخراجات میں اضافہ بھی ہو جائے مگر پھر بھی کھادوں کا متناسب اور بروقت استعمال کریں تاکہ پیداوار میں اضافہ سے ان کے اخراجات منافع کے ساتھ پورے ہو جائیں ۔ انہوں نے کہا کہ زمین کی زرخیزی کو برقرار رکھنے اور سموگ سے بچنے کے لئے فصلوں کی باقیات کو جلانے کی بجائے زمین میں ملائیں کیونکہ اس سے زمین میں نامیاتی مادے کا اضافہ ہو گا اور کھاد پر اٹھنے والے اخراجات میں کمی ہو گی۔

شرکا کو حکومت پنجاب کی طرف سے کاشتکاروں کے لئے جاری کی جانے والی مختلف سکیموں کے متعلق آگاہ کیا گیا۔ تقریب میں ترقی پسند کاشتکاروں میں انعامات تقسیم کئے گئے۔ تقریب کے اختتام پر زیادہ گندم اگاؤ مہم کے سلسلہ میں زرعی یونیورسٹی فیصل آباد سے آئے ہوئے اساتذہ اور طلبا کے ساتھ واک کا اہتمام کیا گیا۔ کنونشن میں متعلقہ حکام اور زمینداروں کی کثیر تعداد نے شرکت کی۔