ملتان میں ایگریکلچر فارم میکانائزیشن پروجیکٹ کی قرعہ اندازی مکمل

جمعرات 11 دسمبر 2025 19:36

ملتان (اُردو پوائنٹ اخبارتازہ ترین - اے پی پی۔ 11 دسمبر2025ء) سابق صوبائی وزیر رانا اعجاز احمد نون نےکہاہے کہ جدید زرعی آلات کی سبسڈی، میکانائزیشن کے فروغ اورکاشتکاروں کو براہِ راست سہولیات کی فراہمی جیسے اقدامات زرعی معیشت کو نئی بنیادیں فراہم کر رہے ہیں۔ ان خیالات کااظہارانہوں نے محکمہ زراعت پنجاب کے تحت مالی سال 2025-26 کیلئے ایگریکلچر فارم میکانائزیشن پروجیکٹ کی قرعہ اندازی کی تقریب سے بطور مہمان خصوصی خطاب کرتے ہو ئے کیا۔

قرعہ اندازی کی تقریب کاٹن ریسرچ انسٹیٹیوٹ ملتان میں منعقدکی گئی۔اس موقع پررانا عجاز حمد نون نےمزید کہاکہ وزیرِاعلیٰ پنجاب مریم نواز شریف کے کسان دوست اقدامات کاشتکاری کو جدید خطوط پر استوار کرنے کے ساتھ ساتھ زیادہ پیداوار اور کسانوں کی آمدن میں اضافے کا اہم ذریعہ بن رہی ہے۔

(جاری ہے)

تقریب کے دوران بریفنگ دیتے ہوئے ڈائریکٹر زرعی انجینئرنگ حارث عبداللہ نے بتایا کہ میکانائز یشن پرو گرام کا مقصد چھوٹے اوردرمیانے درجے کے کاشتکاروں کوجدید ٹیکنالوجی تک رسائی فراہم کرنا ہے تاکہ پیداوری لاگت کم ہو اورفی ایکڑ پیداوار میں اضافہ ممکن بنایا جا سکے۔

پراجیکٹ کی مجموعی لاگت 6,169.931 ملین روپے ہےجبکہ اس کا دورانیہ 2025-26 تا 2027-28 تین سال پرمحیط ہے۔پروجیکٹ میں دوسبسڈی گروپس شامل ہیں۔گروپ-I کے 26 اقسام کے آلات پرفی کسان 5 لاکھ روپے سبسڈی۔ گروپ- II کے 12 اقسام کے آلات پر فی کسان 10 لاکھ روپے سبسڈی ،ضلع ملتان میں 2025-26 کیلئےگروپ-I میں 205 میں سے 178 درخواستیں منظورگروپ-II میں 86 میں سے 78 درخواستیں منظور ہوئیں۔ تقریب کے اختتام پر مہمانِ خصوصی نے کامیاب قرعہ اندازی پر متعلقہ افسران کی کارکردگی کو سراہتے ہوئے اسے کاشتکاروں کی ترقی اور جدید زرعی نظام کے فروغ کی جانب ایک بڑا قدم قرار دیا۔تقریب میں اسسٹنٹ کمشنر ہیڈکوارٹرانعم صغیر نے بھی خصوصی شرکت کی۔