محکمہ زراعت سمبڑیال کی کاشتکاروں کو سورج مکھی کی کاشت 31جنوری تک مکمل کرنے کی ہدایت

جمعرات 8 جنوری 2026 12:17

سیالکوٹ (اُردو پوائنٹ اخبارتازہ ترین - اے پی پی۔ 08 جنوری2026ء) اسسٹنٹ ڈائریکٹر محکمہ زراعت سمبڑیال ڈاکٹر افتخار حسین بھٹی نے کاشتکاروں کو سورج مکھی کی کاشت 31جنوری تک مکمل کرنے کی ہدایت کی ہے۔

(جاری ہے)

انہوں نے کہا ہے کہ سورج مکھی کی فصل سال میں باآسانی 2بار کاشت کی جاسکتی ہے ،خزاں میں کاشت ہونے والی فصل ،بہاریہ فصل کے مقابلہ میں کم پیداوار دیتی ہے، سورج مکھی کی فصل کو صحیح وقت پر کاشت کرنا فصل کی زیادہ پیداوار حاصل کرنے کے لئے بہت ضروری ہے کیونکہ تاخیر سے کاشت کی صورت میں نہ صرف سورج مکھی کی فی ایکڑ پیداوار میں کمی ہوتی ہے بلکہ تیل کی مقدار میں بھی کمی ہوتی ہے۔

۔انہوں نے بتایا کہ کاشتکار سورج مکھی کی کاشت یکم جنوری سے لے کر31جنوری تک مکمل کریں۔انہوں نے کہا کہ کاشتکار سورج مکھی کی کاشت کے لئے اچھے اگا ئووالے صاف دوغلی(ہائبرڈ)اقسام کے بیج کی فی ایکڑ مقدار 2 کلوگرام رکھیں جبکہ بیج کے اگائو کی شرح90 فیصد ہونی چاہیے اور پودوں کی تعداد22 سے23 ہزار فی ایکڑ ہونی چاہیے۔ انہوں نے کہا کہ محکمہ زراعت پنجاب کی سفارش کردہ سورج مکھی کی ہائبرڈ اقسام میں ہائی سن۔ 33،ٹی۔ 40318،ایگورا4، گل بہار436،آکسن 5270،رائینا، ایس 278،یو ایس 666،یو ایس 444 اور این کے آر منی شامل ہیں۔