رحیم یارخان ،شجر کاری مہم کے دوران ضلع بھر 9 لاکھ پودے لگائے جائیں گے،ڈپٹی کمشنر

پیر 9 فروری 2026 17:26

رحیم یارخان (اُردو پوائنٹ اخبارتازہ ترین - اے پی پی۔ 09 فروری2026ء) ڈپٹی کمشنر ظہیر انور جپہ کی زیرِ صدارت موسمِ بہار شجرکاری مہم کے انتظامات کا جائزہ لینے کے لیے ایک اہم اجلاس منعقد ہوا۔ اجلاس میں ضلع کے تمام محکموں کے افسران، اسسٹنٹ کمشنرز کی شرکت کی۔اجلاس کے دوران ڈسٹرکٹ فاریسٹ آفیسر عظیم ظفر نے بریفنگ دیتے ہوئے بتایا کہ محکمہ جنگلات موسمِ بہار شجرکاری مہم کے دوران ضلع بھر میں 9 لاکھ سے زائد پودے لگائے گا، جس کے لیے مختلف مقامات پر زمین کی تیاری کا عمل تیزی سے جاری ہے۔

انہوں نے بتایا کہ شجرکاری کے لیے موزوں مقامات کی نشاندہی مکمل کی جا رہی ہے تاکہ مقررہ ہدف بروقت حاصل کیا جا سکے۔ ڈپٹی کمشنر ظہیر انور جپہ نے تمام اسسٹنٹ کمشنرز کو ہدایت کی کہ وہ اپنی اپنی تحصیلوں میں زیادہ سے زیادہ گرین بیلٹس قائم کریں اور پہلے سے موجود پارکوں اور گرین بیلٹس میں شجرکاری کو یقینی بنائیں۔

(جاری ہے)

انہوں نے ضلع کونسل، میونسپل کمیٹیز اور دیگر محکموں بالخصوص صحت، تعلیم اور زراعت کے افسران کو ہدایت کی کہ وہ اپنے اداروں کی دستیاب جگہوں پر میاں واکی طرز کے چھوٹے جنگلات قائم کریں جبکہ دیگر دستیاب سرکاری اراضی پر بھی بھرپور شجرکاری کی جائے۔

ڈپٹی کمشنر نے زور دیتے ہوئے کہا کہ شجرکاری مہم کو صرف پودے لگانے تک محدود نہ رکھا جائے بلکہ پودوں کی بہتر نشوونما اور حفاظت کے لیے جامع حفاظتی اقدامات کو بھی یقینی بنایا جائے۔ انہوں نے واضح کیا کہ لگائے گئے پودوں کی دیکھ بھال، پانی کی فراہمی اور مانیٹرنگ کے مؤثر انتظامات ناگزیر ہیں تاکہ شجرکاری مہم کے ثمرات دیرپا ثابت ہوں۔انہوں نے مزید کہا کہ شجرکاری ماحولیاتی تحفظ، فضائی آلودگی کے خاتمے اور سرسبز و شاداب ماحول کے قیام کے لیے نہایت اہم ہے، جس کے لیے تمام محکموں کو باہمی اشتراک اور ذمہ داری کے ساتھ اپنا کردار ادا کرنا ہوگا۔

ڈپٹی کمشنر ظہیر انو ر جپہ نے وزیر اعلیٰ پنجاب مریم نواز شریف کے عوامی فلاحی ویژن اوپن ڈور پالیسی کے تحت شہریوں سے براہ راست ملاقات کرتے ہوئے مسائل و شکایات سنی اور موقع پر متعلقہ محکموں کو شکایات حل کرکے رپورٹ جمع کرانے کی ہدایت کی۔\378