مئی و جون کے مہینہ میں جانوروں کے چارے کی قلت پر قابو پانے کیلئے کاشتکاروں کو ماٹ گراس کی کاشت بروقت مکمل کرنے کامشورہ

اتوار 15 فروری 2026 14:50

فیصل آباد (اُردو پوائنٹ اخبارتازہ ترین - اے پی پی۔ 15 فروری2026ء) محکمہ زراعت نے کاشتکاروں کو ماٹ گراس کی کاشت بروقت مکمل کرنے کامشورہ دیا ہے اور کہا ہے کہ چونکہ ماٹ گراس ایک زود ہضم اور غذائیت سے بھر پور متعدد کٹائیاں دینے والا چارہ ہے اسلئے اس کی کاشت سے بہتر نتائج حاصل کئے جا سکتے ہیں۔

(جاری ہے)

ڈپٹی ڈائریکٹر محکمہ زراعت عدیل احمد نے بتایا کہ عام طور پر مئی اور جون کے مہینوں میں چارے کی قلت پید اہو جاتی ہے جبکہ اس عرصہ میں چارے کی کمی کو پورا کرنے کیلئے ماٹ گراس انتہائی اہمیت کا حامل ہو تا ہے جس کو نہ صرف جانور اور مویشی بے حد پسند کرتے ہیں بلکہ شاندار غذائیت کی بدولت ماٹ گراس سے دودھ اور گوشت کی پیداوار میں بھی اضافہ ہو جاتا ہے۔

انہوں نے بتایاکہ ماٹ گراس ایک ایسا پودا ہے جو سخت ترین گرمی بھی باآسانی برداشت کرنے کی صلاحیت رکھتا ہے۔ انہوں نے کہاکہ اس چارے کی ایک خاصیت یہ بھی ہے کہ یہ موسم برسات میں تیزی سے پھلتا پھولتا ہے۔ انہوں نے کہاکہ کاشتکار ماٹ گراس کی کاشت کے متعلق مزید رہنمائی اور معلومات کے حصول یا مشاورت کیلئے جامعہ زرعیہ کے ماہرین زراعت یا فری ایگری کلچر ہیلپ لائن سے بھی رابطہ کر سکتے ہیں۔