اگیتی کپاس کی کاشت کا موزوں وقت وسط فروری تا31 مارچ ،ملتان، ساہیوال،فیصل آباد، سرگودھا اور ڈیرہ غازی خان ڈویژنز کے اضلاع زیادہ موزوں ہیں،محکمہ زراعت

پیر 2 مارچ 2026 13:24

لاہور (اُردو پوائنٹ اخبارتازہ ترین - اے پی پی۔ 02 مارچ2026ء) محکمہ زراعت پنجاب نے کہا ہے کہ اگیتی کپاس کے لئے کاشت کا موزوں وقت وسط فروری تا31 مارچ ہے جس کے لیے ملتان، ساہیوال،فیصل آباد، سرگودھا اور ڈیرہ غازی خان ڈویژنز کے اضلاع زیادہ موزوں ہیں۔ترجمان کے مطابق اگیتی کاشت کےلئے محکمہ زراعت پنجاب کی طرف سے صرف کپاس کی ٹرپل جین اقسام کی سفارش کی جاتی ہے،اس ضمن میں سفارش کی جاتی ہے کہ اگیتی کپاس کی کاشت کےلئے بیج فیڈرل سیڈ سرٹیفکیشن اینڈ رجسٹریشن ڈیپارٹمنٹ کا تصدیق شدہ ہو اور خالص ٹرپل جین قسم کا ہو ورنہ گلا ئفوسیٹ کا سپرے کرنے سے غیر ٹرپل جین اقسام کے پودے مر جائیں گے۔

انہوں نے کہا کہ گلا ئفوسیٹ جڑی بوٹی مار زہر اور ٹینڈے کی سنڈیوں خصوصا گلابی سنڈی کے خلاف قوت مدافعت رکھتی ہیں۔

(جاری ہے)

ان کا کہنا تھا کہ اگیتی کاشت کےلئے پودوں اور قطاروں کا باہمی فاصلہ اور فی ایکٹر تعداد موسمی کاشت کی نسبت کم ہوتی ہے۔ترجمان نے کہا کہ عام طور پر کپاس کی اگیتی کاشت کےلئے پودوں کے قطاروں کا باہمی فاصلہ2.5 فٹ اور پودوں کا باہمی فاصلہ1.5 تا2 فٹ ہونا چاہیے،اگیتی کاشت کےلئے سفارش کردہ اقسام کا معیاری ،تندرست،خالص اور بیماریوں سے پاک بیج استعمال کریں۔

انہوں نے کہا کہ چوکا لگاتے وقت4 تا5 بیج فی چوکا لگا ئیں،اگیتی کپاس کی ڈرل کاشت کےلئے2 تا3 کلو گرام بیج فی ایکڑ زیادہ استعمال کریں۔ان کا کہنا تھا کہ کاشتکار ضرورت سے10 فیصد زیادہ بیج کا انتظام کریں تا کہ ناغے وغیرہ لگانے کےلئے استعمال ہو سکے،یعنی60 فیصد اگائو کی صورت میں5 تا6 کلوگرام بیج استعمال کریں اور75 فیصد یا زیادہ ا گائو کےلئے4 تا 5 کلوگرام بیج فی ایکڑ استعمال کریں۔