دھان کی پنیری کی کاشت 20 مئی سے قبل ہر گز نہ کریں، محکمہ زراعت سمبڑیال

بدھ 1 اپریل 2026 13:39

سمبڑیال (اُردو پوائنٹ اخبارتازہ ترین - اے پی پی۔ 01 اپریل2026ء) دھان کی پنیری کی کاشت 20 مئی سے قبل ہر گز نہ کریں، قبل از وقت کاشت کرنے سے نقصانات کا قوی خدشہ ہے اور قانوناً جرم ہے ۔ان خیالات کا اظہار اسسٹنٹ ڈائریکٹر محکمہ زراعت سمبڑیال ڈاکٹر افتخار حسین بھٹی نے دھان کے کاشتکاروں کے نام اپنے پیغام میں کیا۔ انہوں نے کہا کہ کاشتکار گندم کی کٹائی کے فوراً بعد لاب کی منتقلی کردیتے ہیں جس کیلئے دھان کی پنری کی کاشت اپریل کے پہلے ہفتے کردیتے ہیں، قبل از وقت کاشت سے فصل کا پولی نیشن کا عمل متاثر ہوتا ہے جس سے کاشتکار کو فصل میں نقصان اٹھانا پڑھ سکتا ہے، لہٰذا دھان کی پنیری کی کاشت 20 سے قبل نہ کریں تاکہ نقصان سے بچا جاسکے۔

انہوں نے مزید کہا کہ دھان کی قبل از وقت کاشت تنے کی سنڈی اور دیگر فصلاتی کیڑوں کا ذریعہ بنتی ہے جو بعد ازاں دھان کی کھڑی فصل یا دوسری فصلات پر حملہ آور ہوسکتی ہے۔

(جاری ہے)

آخر میں انہوں نے کہا کہ دھان کی اقسام کسان باسمتی1509 ،انڈین1847 ،انڈین 1692 ،ڈائمنڈ109 اور ڈائمنڈ123 اگیتی کاشت کیلئے ہرگز موزوں نہیں ہیں ،لہٰذا کاشتکاران ان کی کاشت سے اجتناب کریں۔انہوں نے کہا کہ پنجاب ایگریکلچر پیسٹ آرڈیننس1959 اور ذیلی رولز 1960 (رول4)کے تحت دھان کی پنیری کی قبل از وقت کاشت قانوناً جرم ہے اور حکومت پنجاب ایسے کاشتکاروں کے خلاف کارروائی کا حق محفوظ رکھتی ہے جس میں فصل کی تلفی بھی شامل ہے۔