وزیر زراعت پنجاب کا کاشتکاروں میں کمبائن ہارویسٹرز کی چابیاں تقسیم

بدھ 15 اپریل 2026 21:47

لاہور (اُردو پوائنٹ اخبارتازہ ترین - اے پی پی۔ 15 اپریل2026ء) وزیراعلیٰ پنجاب کے ویژن کے تحت زرعی شعبے کی جدید خطوط پر ترقی کے لیے جاری ہائی ٹیک فارم میکانائزیشن فنانسنگ پروگرام کے تحت کسانوں اور سروس پرووائیڈرز کو کمبائن ہارویسٹرز کی پہلی کھیپ فراہم کر دی گئی۔ اس سلسلے میں منعقدہ تقریب میں صوبائی وزیر زراعت و لائیوسٹاک پنجاب سید عاشق حسین کرمانی نے ملت فیکٹری میں خوش نصیب کاشتکاروں اور سروس پرووائیڈرز میں کمبائن ہارویسٹرز کی چابیاں تقسیم کیں۔

اس موقع پر ملت فیکٹری کی انتظامیہ کی جانب سے صوبائی وزیر زراعت کو تفصیلی بریفنگ بھی دی گئی جس میں بتایا گیا کہ گرین ٹریکٹر پروگرامز کے تحت کاشتکاروں کو نمایاں ریلیف ملا ہے جبکہ ملکی ٹریکٹر انڈسٹری کو بھی خاطر خواہ فائدہ پہنچا ہے۔

(جاری ہے)

تقریب کے دوران صوبائی وزیر نے جدید ٹریکٹرز اور ہارویسٹرز کا تفصیلی معائنہ کیا جبکہ فیکٹری کے مختلف شعبہ جات، بشمول آلات کی تیاری، اسمبلنگ ہال اور دیگر پیداواری یونٹس کا بھی دورہ کیا۔

اس موقع پر سپیشل سیکرٹری زراعت پنجاب آغا نبیل اختر، ڈائریکٹر جنرلز محکمہ زراعت پنجاب زاہد مشتاق میربھی موجود تھے۔صوبائی وزیر زراعت و لائیوسٹاک نے اس موقع پر گفتگو کرتے ہوئے کہاکہ ہائی ٹیک فارم میکانائزیشن فنانسنگ پروگرام کے تحت اب تک6700 درخواستیں موصول ہو چکی ہیں۔ مزید برآں 280 درخواست گزاروں کی بکنگ کے نتیجے میں 102 کو زرعی مشینری فراہم کی جا چکی ہے۔

انہوں نے کہا کہ کسانوں کو جدید ٹیکنالوجی کی فراہمی وزیراعلی پنجاب کی اولین ترجیح ہے اور زرعی پیداوار میں اضافہ اور لاگت میں کمی کے لیے جدید زرعی مشینری کا استعمال ناگزیر ہو چکا ہے۔ صوبائی وزیر نے مزید کہا کہ وزیراعلی پنجاب ایگریکلچر ٹرانسفارمیشن پلان کے حوصلہ افزا نتائج سامنے آ رہے ہیں اور گزشتہ دو برسوں میں 30 ہزار سے زائد زرعی مشینری سبسڈی پر کاشتکاروں کو فراہم کی جا چکی ہے۔ انہوں نے مقامی مینوفیکچررز پر زور دیا کہ وہ ہائی ٹیک فارم میکانائزیشن کے فروغ کے لیے آگے آئیں اور اس قومی مقصد میں اپنا کردار ادا کریں۔