ذوالفقار علی کھوسہ مرحوم کے ایصال ثواب کیلئے قرآن خوانی 18 اپریل کوہو گی،سکیورٹی انتظامات مکمل

جمعرات 16 اپریل 2026 19:22

ڈیرہ غازی خان (اُردو پوائنٹ اخبارتازہ ترین - اے پی پی۔ 16 اپریل2026ء) سابق گورنر پنجاب سردار ذوالفقار علی خان کھوسہ (مرحوم) کی قرآن خوانی کے موقع پر ڈیرہ غازی خان پولیس نے سکیورٹی کے فول پروف انتظامات مکمل کر لیے ہیں۔ اس سلسلے میں ڈسٹرکٹ پولیس آفیسر (ڈی پی او) ڈیرہ غازی خان نے خود موقع کا دورہ کیا اور سکیورٹی اقدامات کا جائزہ لیا۔ترجمان ڈیرہ غازیخان پولیس کے مطابق قرآن خوانی کے دوران امن و امان برقرار رکھنے کے لیے پولیس کی بھاری نفری تعینات کی جائے گی، جبکہ داخلی و خارجی راستوں پر مؤثر چیکنگ کا نظام قائم کیا گیا ہے۔

اس حوالے سے ڈی پی او نے افسران اور جوانوں کو ہدایت کی کہ وہ اپنی ذمہ داریاں پوری مستعدی اور فرض شناسی سے سرانجام دیں اور کسی بھی مشتبہ سرگرمی پر کڑی نظر رکھیں۔

(جاری ہے)

اس کے ساتھ مقامِ قل خوانی اور اس کے گردونواح میں بھی سکیورٹی کو یقینی بنایا جائے گا۔مزید برآں، ٹریفک کی روانی برقرار رکھنے کے لیے خصوصی ٹریفک پلان ترتیب دیا گیا ہے تاکہ شہریوں کو کسی قسم کی پریشانی کا سامنا نہ کرنا پڑے۔ڈی پی او نے کہاکہ شہریوں کی جان و مال کا تحفظ پولیس کی اولین ترجیح ہے اور اس ضمن میں کسی بھی قسم کی غفلت برداشت نہیں کی جائے گی۔واضح رہے کہ سردار ذوالفقار علی کھوسہ مرحوم کے ایصال ثواب کیلئے قرآن خوانی 18 اپریل بروز ہفتہ کو دوپہر 2 بجے شہر مرکزی عید گاہ منعقد ہو گی۔