پنز کے ڈاکٹروں کی کامیاب سر جری ، نوجوان کی آنکھ اور دماغ میں پیوست راڈ نکال دیا، پروفیسر آصف بشیر

پیر 4 مئی 2026 20:31

لاہور (اُردو پوائنٹ اخبارتازہ ترین - اے پی پی۔ 04 مئی2026ء) پنجاب انسٹیٹیوٹ آف نیوروسائنسز لاہور کے نیوروسرجنز نے ایک بار پھر طبی میدان میں نئی مثال قائم کر دی۔پسرور سے تعلق رکھنے والے نوجوان علی حسن کی بائیں آنکھ کے راستے دماغ میں پیوست راڈ کو کامیابی سے نکال کر اس کی جان بچا لی گئی۔ تفصیلات کے مطابق علی حسن نجی سٹیل مل میں کام کر رہا تھا کہ اچانک راڈ اس کی بائیں آنکھ اوردماغ کے حساس حصوں سے ہوتا ہوا کھوپڑی کے پچھلے حصے سے باہر نکل آیا۔

مریض کو تشویش ناک حالت میں گوجرانوالہ سے پنز لاہور منتقل کیا گیا۔ایگزیکٹو ڈائریکٹر پروفیسر ڈاکٹر آصف بشیر نے فوری طور پر ایک اعلیٰ سطح کی سرجیکل ٹیم تشکیل دی جس میں پروفیسر ڈاکٹر حافظ عبدالماجد، ڈاکٹر خاور زمان اور ڈاکٹر وردہ شامل تھیں۔

(جاری ہے)

ٹیم نے جدید ترین نیوروسرجیکل تکنیک کے تحت کئی گھنٹوں کی انتہائی پیچیدہ سرجری کے بعد راڈ کو کامیابی سے نکال لیا۔

سرجری کے بعد مریض کی حالت میں مسلسل بہتری آ رہی ہے اور وہ تیزی سے صحت یاب ہو رہا ہے۔پروفیسر ڈاکٹر آصف بشیر نے اس کامیاب آپریشن پر گفتگو کرتے ہوئے کہاکہ یہ صرف ایک کامیاب سرجری نہیں بلکہ پنز لاہور کی ٹیم ورک، پیشہ ورانہ مہارت اور جدید سہولیات کا منہ بولتا ثبوت ہے۔ نیورو انسٹی ٹیوٹ اب نیوروسرجری کے شعبے میں ملک کا رول ماڈل بن چکا ہے۔ وزیراعلی ٰ پنجاب کی خصوصی ہدایات پر ہم مریضوں کو عالمی معیار کا علاج فراہم کرنے کے لیے مسلسل جدید سہولیات کا اضافہ کر رہے ہیں۔انہوں نے ڈاکٹرز، نرسنگ اور پیرامیڈیکل سٹاف کی دن رات کی محنت اور لگن کو سراہا اور کہا کہ پنز دکھی انسانیت کی خدمت کا سفر آئندہ بھی پوری تندہی سے جاری رکھے گا۔