رجب بٹ کو عدالت پیشی پر پولیس پروٹوکول دینے کیخلاف درخواست دائر، فریقین سے جواب طلب

منگل 5 مئی 2026 16:14

لاہور (اُردو پوائنٹ اخبارتازہ ترین - این این آئی۔ 05 مئی2026ء) لاہور ہائیکورٹ میں یوٹیوبر رجب بٹ کو عدالت پیشی پر پولیس پروٹوکول دینے کے خلاف درخواست دائر کردی گئی،عدالت نے فریقین سے جواب طلب کرتے ہوئے سماعت 11مئی تک ملتوی کردی، درخواست میں آئی جی پنجاب، ڈی آئی جی سکیورٹی اور رجب بٹ کو فریق بنایا گیا۔

(جاری ہے)

درخواست گزار نے موقف اپنایا کہ رجب بٹ کے خلاف سیشن کورٹ میں خاتون سے زیادتی کے مقدمے کا ٹرائل چل رہا ہے، اس مقدمے میں وہ خود رجب بٹ کے خلاف گواہ ہے، ملزم ہونے کے باوجود رجب بٹ کو ہر پیشی پر پولیس پروٹوکول دیا جاتا ہے۔

درخواست گزار کا کہنا ہے کہ رجب بٹ نا پبلک آفس ہولڈر ہیں، نا سرکاری عہدہ ہے، زیادتی کے مقدمے میں نامزد ملزم کو پولیس پروٹوکول دینا غیر قانونی ہے، ایک ملزم کو پروٹوکول دینا سرکاری خزانے کا ناجائز استعمال ہے۔درخواست گزار نے عدالت سے استدعا کی کہ رجب بٹ کو عدالت پیشی کے موقع پر دیا جانے والا پروٹوکول واپس لینے کا حکم دیا جائے۔