جیکب آباد میں پانی کا بحران برقرار، ایک ماہ سے زائد عرصے سے شہری واٹر سپلائی کے پانی سے محروم

جمعرات 11 جون 2026 19:45

جیکب آباد (اُردو پوائنٹ اخبارتازہ ترین - این این آئی۔ 11 جون2026ء) جیکب آباد میں پانی کا بحران برقرار، ایک ماہ سے زائد عرصے سے شہری واٹر سپلائی کے پانی سے محروم۔

(جاری ہے)

تفصیلات کے مطابق جیکب آباد میں پانی کا سنگین بحران تاحال حل نہ ہوسکا، ایک ماہ سے زائد عرصہ گزر جانے کے باوجود شہریوں کو واٹر سپلائی اسکیم کے ذریعے پانی کی فراہمی بحال نہیں ہوسکی جس کے باعث ہزاروں شہری شدید مشکلات کا سامنا کررہے ہیں، شہر کے مختلف علاقوں میں گزشتہ ایک ماہ سے زائد عرصے سے واٹر سپلائی اسکیم بند پڑی ہے جس کے نتیجے میں شہری پینے اور گھریلو استعمال کے پانی کے لیے پریشان ہیں، شہریوں کا کہنا ہے کہ شدید گرمی کے موسم میں پانی کی عدم دستیابی نے ان کی مشکلات میں اضافہ کر دیا ہے اور انہیں مہنگے داموں ٹینکرز اور دیگر ذرائع سے پانی حاصل کرنا پڑرہا ہے ، شہریوں کے مطابق میونسپل انتظامیہ اور ضلعی انتظامیہ کی جانب سے متعدد بار دعوے کیے گئے کہ واٹر سپلائی اسکیم کو جلد فعال کرکے شہر میں پانی کی فراہمی بحال کر دی جائے گی تاہم یہ دعوے تاحال عملی شکل اختیار نہیں کرسکے، شہریوں کا کہنا ہے کہ نہروں میں پانی کی آمد کے باوجود واٹر سپلائی اسکیم سے پانی کی فراہمی شروع نہ ہونا انتظامیہ کی نااہلی کا منہ بولتا ثبوت ہے ، عوامی حلقوں کا کہنا ہے کہ جیکب آباد جیسے شدید گرم شہر میں پانی کی مسلسل قلت ایک سنگین انسانی مسئلہ بنتی جارہی ہے، خواتین، بچے اور بزرگ روزانہ پانی کے حصول کے لیے دربدر ہونے پر مجبور ہیں جبکہ غریب طبقہ مہنگے داموں پانی خریدنے سے قاصر ہے ، شہریوں نے ڈپٹی کمشنر جیکب آباد اور میونسپل انتظامیہ سے مطالبہ کیا ہے کہ واٹر سپلائی اسکیم سے پانی کی فراہمی بحال کی جائے اور عوام کا بنیادی مسئلہ حل کیا جائے، شہریوں کا کہنا ہے کہ بار بار اعلانات اور یقین دہانیوں کے بجائے عملی اقدامات کی ضرورت ہے تاکہ شہر میں پانی کا بحران مستقل بنیادوں پر حل ہوسکے۔