جیکب آباد، مایوں میں بیٹھی دلہن شادی سے ایک دن قبل بے دردی سے قتل، شادی کی خوشیاں ماتم میں تبدیل

جمعہ 12 جون 2026 23:13

جیکب آباد (اُردو پوائنٹ اخبارتازہ ترین - این این آئی۔ 12 جون2026ء) جیکب آباد، مایوں میں بیٹھی دلہن شادی سے ایک دن قبل بے دردی سے قتل، شادی کی خوشیاں ماتم میں تبدیل۔

(جاری ہے)

تفصیلات کے مطابق جیکب آباد کی تحصیل ٹھل کے سی سیکشن تھانے کی حدود میں واقع گاؤں گل خان بنگلانی میں مایوں میں بیٹھی ایک نوجوان دلہن کو فائرنگ کرکے قتل کردیا گیا، واقعے کے بعد شادی کی خوشیاں ماتم میں تبدیل ہوگئیں، اطلاعات کے مطابق ملزم زاہد بنگلانی نے اپنے 5دیگر ساتھیوں کے ہمراہ نوجوان لڑکی جنت خاتون کو مبینہ طور پر شادی سے انکار پر گولیاں مار کر قتل کردیا، مقتولہ کی لاش ضروری کارروائی کے لیے تعلقہ اسپتال ٹھل منتقل کردی گئی، مقتولہ کی والدہ حسینہ خاتون کے مطابق ان کی بیٹی جنت خاتون مایوںمیں بیٹھی تھی اور اس کا نکاح اگلے روز شکل بنگلانی کے ساتھ طے تھا انہوں نے الزام عائد کیا کہ ملزم زاہد بنگلانی اپنے بھائیوں اور دیگر کے ہمراہ موٹر سائیکلوں پر سوار ہوکر گھر پر حملہ کرکے ان کی بیٹی کو گولیاں مار کر قتل کردیا، مقتولہ کے بھائی نظر محمد بنگلانی نے بتایا کہ ان کی بہن کا رشتہ شکل بنگلانی کے ساتھ طے تھا اور اگلے روز اس کا نکاح ہونا تھا ان کے بقول ملزم زاہد بنگلانی زبردستی ان کی بہن سے شادی کرنا چاہتا تھا اور اسی رنجش پر اس نے فائرنگ کرکے اسے قتل کردیا، ورثا نے پولیس اور اعلیٰ حکام سے مطالبہ کیا ہے کہ ملزم کو فوری گرفتار کرکے سخت قانونی کارروائی عمل میں لائی جائے اور مقتولہ کے اہل خانہ کو انصاف فراہم کیا جائے۔