جہیزکی گاڑی فروخت کرنے کا جھگڑا‘ہائی کورٹ نے شوہرکی ضمانت کنفرم کردی

مقدمہ میاں بیوی کے خراب تعلقات کا نتیجہ معلوم ہوتا ہے، ملزم تفتیش میں شامل ہو چکا ہے اور ریکارڈ پر کسی بد نیتی کا ثبوت نہیں. جسٹس طارق محمود باجوہ کا تحریری فیصلہ

میاں محمد ندیم منگل 21 جولائی 2026 17:42

جہیزکی گاڑی فروخت کرنے کا جھگڑا‘ہائی کورٹ نے شوہرکی ضمانت کنفرم کردی

لاہور(اردوپوائنٹ اخبارتازہ ترین-انٹرنیشنل پریس ایجنسی۔21 جولائی ۔2026 ) بیوی نے اختلافات پر جہیز میں ملنے والی گاڑی فروخت کرنے پر شوہر پر امانت میں خیانت اور فراڈ کا مقدمہ درج کرا دیا تاہم لاہور ہائی کورٹ نے شوہر کی درخواست منظور کر تے ہوئے 2 لاکھ روپے کے مچلکوں کے عوض شوہر کی عبوری ضمانت کنفرم کر دی. جسٹس طارق محمود باجوہ نے شہری کی عبوری ضمانت منظور کر کے فیصلہ جاری کر دیا جس میں کہا گیا ہے کہ بیوی نے شوہر کے پاس بطور امانت رکھوائی گئی گاڑی فروخت کرنے پر مقدمہ درج کرایا، ریکارڈ کے مطابق گاڑی بیوی کے نام تھی اور شوہر محض استعمال کر رہا تھا.

(جاری ہے)

عدالت کا کہنا ہے کہ درخواست گزار کے مطابق بیوی نے خاندانی تنازع پر مقدمہ درج کرایا، بیوی نے جہیز کے سامان کا دعویٰ بھی فیملی کورٹ میں دائر کر رکھا ہے عدالتی فیصلے میں کہا گیا ہے کہ شکایت کنندہ نے خود فیملی کورٹ میں گاڑی کو جہیز کا سامان قرار دیا تھا، بیوی نے ایف آئی آر میں زیر التواءفیملی مقدمے کا ذکر نہیں کیا. عدالت نے قراردیا کہ ریکارڈ کے مطابق گاڑی اب بھی بیوی کے نام پر رجسٹرڈ ہے مقدمہ میاں بیوی کے خراب تعلقات کا نتیجہ معلوم ہوتا ہے، ملزم تفتیش میں شامل ہو چکا ہے اور ریکارڈ پر کسی بد نیتی کا ثبوت نہیں.