ڑ*لاہور چیمبر میں وفاقی ٹیکس محتسب کا فیسیلیٹیشن آفس قائم کرنے کا فیصلہ &نیا سہولت دفتر شکایات کے اندراج، رہنمائی اور فوری ازالے میں کاروباری برادری کی معاونت کریگا &صدر لاہور چیمبر اور ڈائریکٹر جنرل وفاقی ٹیکس محتسب میں ٹیکس دہندگان کے مسائل کے حل پر اتفاق

جمعرات 23 جولائی 2026 21:10

Oلاہور(اُردو پوائنٹ اخبارتازہ ترین - آن لائن۔ 23 جولائی2026ء) لاہور چیمبر آف کامرس اینڈ انڈسٹری میں وفاقی ٹیکس محتسب کا ’’فیسیلیٹیشن آفس‘‘ قائم کرنے پر اتفاق کر لیا گیا۔ اس فیصلے کا مقصد ٹیکس دہندگان کو رہنمائی، شکایات کے اندراج اور ان کے بروقت ازالے کے لیے ایک مؤثر پلیٹ فارم فراہم کرنا ہے۔یہ اتفاق رائے وفاقی ٹیکس محتسب (پنجاب) کے ڈائریکٹر جنرل ریاض حمید چوہدری اور لاہور چیمبر آف کامرس اینڈ انڈسٹری کے صدر فہیم الرحمٰن سہگل کے درمیان ہونے والی ملاقات میں ہوا۔

اس موقع پر وفاقی ٹیکس محتسب کے ڈائریکٹر طاہر ضمیر بھی موجود تھے۔ملاقات میں ٹیکس دہندگان کو درپیش مسائل، شکایات کے ازالے کے نظام اور دونوں اداروں کے درمیان تعاون بڑھانے کے مختلف امور پر تبادلہ خیال کیا گیا۔

(جاری ہے)

صدر لاہور چیمبر فہیم الرحمٰن سہگل نے وفاقی ٹیکس محتسب کے کردار کو سراہتے ہوئے کہا کہ کاروباری برادری کو اکثر انتظامی اور طریقہ کار سے متعلق مشکلات کا سامنا رہتا ہے، جن کا بروقت حل ناگزیر ہے۔

انہوں نے کہا کہ لاہور چیمبر تاجروں اور صنعتکاروں کے مفادات کے تحفظ اور تجارت، صنعت و سرمایہ کاری سے متعلق مسائل کے حل کے لیے اپنا کردار جاری رکھے گا۔ڈائریکٹر جنرل وفاقی ٹیکس محتسب ریاض حمید چوہدری نے کہا کہ ان کا ادارہ ٹیکس دہندگان کو انتظامی کوتاہیوں اور غیر ضروری تاخیر کے باعث پیش آنے والی مشکلات سے فوری ریلیف فراہم کرنے کے لیے سرگرم عمل ہے۔

انہوں نے کہا کہ کاروباری برادری ملکی معیشت، سرمایہ کاری اور روزگار کے فروغ میں کلیدی کردار ادا کرتی ہے، اس لیے ان کے جائز مسائل کا شفاف اور مؤثر حل ضروری ہے۔انہوں نے بتایا کہ وفاقی ٹیکس محتسب کے پاس شکایات کے اندراج اور فوری ازالے کا مؤثر نظام موجود ہے، جہاں ٹیکس دہندگان آن لائن سمیت مختلف ذرائع سے اپنی شکایات درج کرا سکتے ہیں، جبکہ علاقائی دفاتر بھی اس سلسلے میں سہولیات فراہم کر رہے ہیں۔

ملاقات میں یہ بھی طے پایا کہ لاہور چیمبر آف کامرس اینڈ انڈسٹری کے دفتر میں قائم ہونے والاوفاقی ٹیکس محتسب فیسیلیٹیشن آفس ٹیکس دہندگان کو رہنمائی فراہم کرے گا، شکایات درج کرانے میں معاونت کرے گا اور متعلقہ اداروں سے رابطے کے ذریعے مسائل کے جلد از جلد حل کو یقینی بنائے گا۔

Facebook Twitter Google + Share on Whatsapp

متعلقہ عنوان :

مزید قومی خبریں