ایم این ایس یونیورسٹی آف انجینئرنگ اینڈ ٹیکنالوجی میں داخلوں کے لیے انٹری ٹیسٹ کا انعقاد

پیر 3 اگست 2026 18:38

ملتان (اُردو پوائنٹ اخبارتازہ ترین - اے پی پی۔ 03 اگست2026ء) محمد نواز شریف یونیورسٹی آف انجینئرنگ اینڈ ٹیکنالوجی ملتان میں داخلوں کے لیے انٹری ٹیسٹ کامیابی سے منعقد ہوا ۔انٹری ٹیسٹ میں مختلف انجینئرنگ اور انجینئرنگ ٹیکنالوجی پروگراموں میں داخلے کے خواہشمند طلبہ و طالبات کی بڑی تعداد نے شرکت کی۔یونیورسٹی انتظامیہ کے مطابق انٹری ٹیسٹ داخلہ شیڈول کے مطابق شفاف، منظم اور پرامن ماحول میں منعقد کیا گیا۔

رجسٹرار محمد نواز شریف یونیورسٹی آف انجینئرنگ اینڈ ٹیکنالوجی ملتان، پروفیسر ڈاکٹر عاصم عمر نے امتحانی مراکز کا دورہ کیا اور انتظامات کا جائزہ لیا۔ اس موقع پر انہوں نے امتحانی عملے کو ہدایت کی کہ شفافیت، نظم و ضبط اور میرٹ کو ہر صورت یقینی بنایا جائے تاکہ تمام امیدواروں کو منصفانہ اور سازگار امتحانی ماحول فراہم کیا جا سکے۔

(جاری ہے)

رجسٹرار نے امتحانی انتظامات پر اطمینان کا اظہار کرتے ہوئے متعلقہ افسران اور عملے کی کاوشوں کو سراہا۔

انہوں نے امیدواروں کے لیے نیک خواہشات کا اظہار کرتے ہوئے کہا کہ یونیورسٹی معیاری تعلیم کے فروغ اور میرٹ پر مبنی داخلہ پالیسی پر سختی سے عمل پیرا ہے۔یونیورسٹی کے مطابق اس سال سب سے زیادہ امیدواروں نے الیکٹریکل انجینئرنگ پروگرام میں شرکت کی، جبکہ کیمیکل انجینئرنگ دوسرے اور فوڈ انجینئرنگ تیسرے نمبر پر رہی۔ اس کے علاوہ الیکٹریکل انجینئرنگ ٹیکنالوجی، مکینیکل انجینئرنگ ٹیکنالوجی، سول انجینئرنگ ٹیکنالوجی، کیمیکل انجینئرنگ ٹیکنالوجی اور سافٹ ویئر انجینئرنگ ٹیکنالوجی سمیت مختلف پروگراموں میں بھی امیدواروں نے بھرپور شرکت کی۔

یونیورسٹی انتظامیہ کے مطابق انٹری ٹیسٹ کے نتائج جلد یونیورسٹی کی ویب سائٹ پر جاری کیے جائیں گے، جبکہ داخلہ میرٹ انٹری ٹیسٹ اور فرسٹ ایئر میں حاصل کردہ نمبروں کی بنیاد پر مرتب کیا جائے گا۔