کشمیریوں کو اپنی زمین، وسائل اور روزگار کے تحفظ کیلئے آئینی ضمانتیں ملنی چاہئیں، پون کھیرا

جمعرات 6 اگست 2026 13:15

سرینگر (اُردو پوائنٹ اخبارتازہ ترین - اے پی پی۔ 06 اگست2026ء) کانگریس کے سینئر رہنما اور پارلیمنٹ کے ایوان بالا راجیہ سبھا کے رکن پون کھیرا نے کہا ہے کہ کانگریس جموں وکشمیر کی ریاستی حیثیت کی بحالی اور کشمیریوں کے حقوق کے لیے آئینی تحفظات کی حمایت کرتی ہے۔کشمیر میڈیاسروس کے مطابق پون کھیرا نے جموں و کشمیر کے دورے کے دوران سرینگر میں قائم ایک خبررساں ادارے کے ساتھ اپنی گفتگو کے دوران کہا کہ سیاسی بات چیت سے پہلے عوامی شکایات کو دور کرنے کی ضرورت ہے ۔

انہوں نے کہا کہ وہ لوگوں کے تحفظات کو سمجھنے کیلئے کشمیر کے دورے پر آئے ہیں۔

(جاری ہے)

انہوں نے کہا کہ خطے سے چھینی گئی ریاستی حیثیت کو بحال کیا جانا چاہیے اور اس کے باشندوں کو اپنی زمین، وسائل اور روزگار کے مواقع کے تحفظ کے لیے آئینی ضمانتیں ملنی چاہئیں۔انہوں نے کہاکہ کشمیر کے نوجوانوں کو ملازمتوں کا حق بھی ملنا چاہیے۔ پون کھیرا نے جموں و کشمیر کی موجودہ صورتحال پر تشویش کا اظہار کرتے ہوئے کہا کہ بہت سے نوجوان جیل میں ہیں اور بامعنی بات چیت رک گئی ہے۔انہوں نے کہا کہ کانگریس کا خیال ہے کہ پہلی ترجیح یہ ہونی چاہیے کہ لوگوں کے دکھوں کو دور کیا جائے۔ اگر لوگ زخمی ہیں تو آپ سیاست کی شروعات نہیں کر سکتے، سب سے پہلے، زخموں کو بھرنا چاہیے۔