جناح سندھ میڈیکل یونیورسٹی میں IGNITE 2.0 اسپورٹس چیمپئن شپ اختتام پذیر

منگل 11 اگست 2026 23:02

کراچی (اُردو پوائنٹ اخبارتازہ ترین - این این آئی۔ 11 اگست2026ء) جناح سندھ میڈیکل یونیورسٹی میں 79ویں یومِ آزادی کی تقریبات کے سلسلے میں جاری ‘‘آزادی فورٹ نائٹ’’ کے تحت سہ روزہ بین الجامعاتی میڈیکل اسپورٹس چیمپئن شپ ‘‘IGNITE 2.0’’ 10 اگست 2026 کو اختتام پذیر ہوگئی۔ چیمپئن شپ میں فٹسال اور والی بال کے مقابلے منعقد ہوئے، اختتامی تقریب کی مہمانِ خصوصی پرو وائس چانسلر جے ایس ایم یو پروفیسر ڈاکٹر نگہت علی شاہ تھیں۔

اس موقع پر رجسٹرار ڈاکٹر اعظم خان، ڈائریکٹر کیو ای سی ڈاکٹر عبد الواحد عثمانی، ڈائریکٹر فنانس جناب خرم خالد، ڈائریکٹر ایڈمنسٹریشن جناب سہراب زمان، ڈائریکٹر اسٹوڈنٹ افیئرز محترمہ زہرا سیمین، وائس پرنسپل سندھ میڈیکل کالج ڈاکٹر نازش جعفر اور ڈاکٹر ایم فہد خان بھی موجود تھے۔

(جاری ہے)

جے ایس ایم یو وائٹ نے فٹسال اور گرلز والی بال چیمپئن شپ اپنے نام کی، جبکہ اے کے یو نے بوائز والی بال کا ٹائٹل حاصل کیا اور جے ایس ایم یو وائٹ رنر اًپ رہی۔

نمایاں انفرادی کارکردگی پر جے ایس ایم یو کے عمر اور علی کاظمی، ڈی یو ایچ ایس کے مفیز، اے کے یو کے باسط اور راجہ، جبکہ جے ایس ایم یو کے واجد کو مختلف اعزازات سے نوازا گیا۔وائس چانسلر جے ایس ایم یو پروفیسر ڈاکٹر امجد سراج میمن نے IGNITE 2.0 کو طلبہ میں ٹیم ورک، صحت مند مسابقت اور مثبت سرگرمیوں کے فروغ کا مؤثر پلیٹ فارم قرار دیا۔ پرو وائس چانسلر پروفیسر ڈاکٹر نگہت علی شاہ نے تمام ٹیموں کو مبارکباد دیتے ہوئے منتظمین، فیکلٹی، اسٹاف اور طلبہ کی کاوشوں کو سراہا۔ 7 سے 10 اگست تک جاری رہنے والی چیمپئن شپ نے آزادی فورٹ نائٹ کی تقریبات میں کھیلوں کا جوش و جذبہ شامل کرتے ہوئے جے ایس ایم یو کے طلبہ کی قائدانہ صلاحیتوں، کھیلوں اور ٹیم اسپرٹ کو اجاگر کیا۔