این سی سی آئی اے پنجاب کا اوڈ گینگ کےخلاف بڑا کریک ڈائون،3 گرفتار

بدھ 19 اگست 2026 14:47

لاہور (اُردو پوائنٹ اخبارتازہ ترین - اے پی پی۔ 19 اگست2026ء) ڈائریکٹرنیشنل سائبر کرائم انویسٹیگشن ایجنسی ( این سی سی آئی اے )لاہور نے سرکاری اداروں کے افسران بن کر شہریوں کو دھمکانے، بینک اکاونٹس بلاک کرنے کی جعلی اطلاعات دینے اور رقم بٹورنے والے اوڈ گینگ کے خلاف بڑی کارروائی کرتے ہوئے تین ملزمان کو گرفتار کر لیا۔ترجمان این سی سی آئی اے کے مطابق گرفتار ملزمان شہریوں سے رابطہ کرکے خود کو مختلف سرکاری اداروں کے افسران ظاہر کرتے تھے۔

ملزمان شہریوں کو یہ کہہ کر خوفزدہ کرتے تھے کہ ان کے بینک اکائونٹ میں مشکوک ٹرانزیکشن ہوئی ہے اور اکائونٹ بلاک کیا جا سکتا ہے، اس کے بعد اکائونٹ کو بلاک ہونے سے بچانے یا معاملہ ختم کرنے کے نام پر شہریوں سے رقم طلب کی جاتی تھی۔

(جاری ہے)

تحقیقاتی حکام کے مطابق اسی طریقہ واردات کے ذریعے ملزمان نے ایک خاتون سے 15 لاکھ روپے حاصل کیے۔ شکایت موصول ہونے پر این سی سی آئی اے لاہور نے تحقیقات شروع کیں اور کارروائی کرتے ہوئے محمد عارف، محمد یونس ساجد اور محمد ندیم کو گرفتار کر لیا۔

کارروائی کے دوران ملزمان کے قبضے سے تین موبائل فونز برآمد ہوئے۔ ابتدائی تحقیقات میں ان موبائل فونز سے 12 سے زائد جعلی جیز کیش اکائونٹس کا سراغ بھی ملا جنہیں فراڈ کے لیے استعمال کیا جاتا تھا۔ این سی سی آئی اے کی تحقیقاتی ٹیم ان اکائونٹس کی تفصیلات، لین دین اور ان سے منسلک دیگر افراد کے بارے میں مزید تحقیقات کر رہی ہے۔حکام کے مطابق تفتیش کا دائرہ وسیع کر دیا گیا ہے اور یہ معلوم کیا جا رہا ہے کہ گرفتار ملزمان نے اسی طریقہ واردات کے ذریعے مزید کتنے شہریوں کو نشانہ بنایا اور جعلی اکائونٹس کے ذریعے کتنی رقم منتقل کی گئی۔

ڈائریکٹر این سی سی آئی اے پنجاب محمد علی وسیم کی ہدایات پر سائبر فراڈ اور سرکاری اداروں کی نقالی کرنے والے عناصر کے خلاف کارروائیاں مزید تیز کر دی گئی ہیں۔ این سی سی آئی اے نے شہریوں کو بھی ہدایت کی ہے کہ کسی بھی شخص کے سرکاری افسر ہونے کے دعوے پر خوفزدہ ہو کر رقم منتقل نہ کریں اور مشکوک رابطے کی صورت میں فوری طور پر متعلقہ ادارے سے تصدیق کریں۔