اسلام آباد پولیس کا جرائم پیشہ عناصر کے خلاف کریک ڈاؤن، 57 ملزمان گرفتار

جمعہ 21 اگست 2026 23:22

اسلام آباد (اُردو پوائنٹ اخبارتازہ ترین - اے پی پی۔ 21 اگست2026ء) اسلام آباد پولیس نے جرائم کے انسداد اور جرائم پیشہ عناصر کے خلاف جاری کریک ڈاؤن کے دوران سنگین جرائم میں ملوث 57 ملزمان کو گرفتار کرلیا۔ گرفتار افراد میں منشیات فروشی اور غیر قانونی اسلحہ رکھنے والے ملزمان کے علاوہ اشتہاری مجرمان، سابقہ ریکارڈ یافتہ افراد اور عدالتی مفروران بھی شامل ہیں، جن کے قبضے سے بھاری مقدار میں منشیات اور اسلحہ برآمد کیا گیا ہے۔

پولیس ترجمان کے مطابق اسلام آباد پولیس ٹیموں نے منشیات فروشی اور غیر قانونی اسلحہ رکھنے میں ملوث 25ملزمان کو گرفتار کر لیا۔گرفتار ملزمان کے قبضہ سے 2,485 گرام آئس،530گرام چرس،10 بوتل شراب اور مختلف بور کے 14 عدد پستول معہ ایمونیشن برآمد کئے گئے۔

(جاری ہے)

گرفتار ملزمان کے خلاف مقدمات درج کرکے مزید تفتیش جاری ہے جبکہ مجرمان اشتہاری،سابقہ ریکارڈ یافتہ اور عدالتی مفرروان کی گرفتاری کیلئے چلائی جانے والی خصوصی مہم کے دوران 32 مجرمان کی گرفتاری عمل میں لا ئی گئی۔

ایس ایس پی آپریشنز اسلام آباد قاضی علی رضا نے کہا کہ اسلام آباد پولیس وفاقی دارالحکومت میں شہریوں کی جان ومال کے تحفظ کو یقینی بنانے کیلئے ہمہ وقت مصروف عمل ہے۔ اسلام آباد پولیس کی ’’نو ٹو ویپن‘‘مہم کے تحت غیر قانونی اسلحہ،اسلحہ کی نمائش اور ہوائی فائرنگ کے خلاف بھر پور کارروائیاں کرنے،سابقہ ریکارڈ یافتہ اشتہاری مجرمان کی گرفتاری اور شہریوں کو فوری انصاف کی فراہمی کے لئے بھرپور اقدامات کئے جارہے ہیں۔انہوں نے شہریوں سے گزارش کی کہ وہ کسی بھی مشکوک سرگرمی کے متعلق متعلقہ تھانہ یاایمرجنسی ہیلپ لائن ''پکار''15-پرفوری اطلاع دیں تاکہ پولیس اور عوام کے باہمی تعاون سے شہر کو جرائم سے پاک کیاجاسکے۔