یونیورسٹی آف سیالکوٹ میں شعبہ نفسیات کے زیر اہتمام اوپن ہاؤس 2026 کا انعقاد

سیالکوٹ (اُردو پوائنٹ اخبارتازہ ترین - اے پی پی۔ 25 اگست2026ء) یونیورسٹی آف سیالکوٹ کے شعبہ نفسیات کے زیر اہتمام ڈیپارٹمنٹل اوپن ہاؤس 2026ء بعنوان ’’اوپن سینیگنیشن ،خوبصورت ذہن مستقبل کی تشکیل کرتے ہیں‘‘ منعقد ہوا جس میں نفسیات، تخلیقی سرگرمیوں اور تفریح کو یکجا کرتے ہوئے ذہنی صحت اور نفسیاتی بہبود کے حوالے سے آگاہی اجاگر کی گئی۔ تقریب کا مقصد طلبہ کو کلاس روم کی روایتی سرگرمیوں سے ہٹ کر نفسیات کے مختلف تصورات کو عملی، تخلیقی اور دلچسپ انداز میں سمجھنے کا موقع فراہم کیا گیا، اس موقع پر فلم کی نمائش، نفسیاتی کھیل، اسٹینڈ اپ کامیڈی، جیمِنگ سیشن اور فکری و معلوماتی گفتگو کا اہتمام کیا گیا جس میں طلبہ نے بھرپور دلچسپی کا اظہار کیا۔

تقریب کے دوران ممتاز مہمان مقررین علی جواد، کلینیکل کونسلر ہیپی نس کلینک، اور زوبیہ احسان، وزٹنگ لیکچرر گورنمنٹ کالج ویمن یونیورسٹی سیالکوٹ نے خصوصی شرکت کی اور ذہنی صحت، جذباتی مضبوطی اور نوجوان نسل کے لیے معاون ماحول کی اہمیت پر اظہار خیال کیا۔

(جاری ہے)

مقررین نے کہا کہ موجودہ دور میں ذہنی صحت کو جسمانی صحت کے برابر اہمیت دینا ناگزیر ہے، نوجوانوں کو ذہنی دباؤ اور دیگر نفسیاتی مسائل کو نظر انداز کرنے کے بجائے بروقت رہنمائی اور مناسب معاونت حاصل کرنی چاہیے جبکہ معاشرے کے ہر فرد کی ذمہ داری ہے کہ وہ اپنے اردگرد موجود لوگوں کی ذہنی اور جذباتی کیفیت کو سمجھنے اور انہیں مثبت ماحول فراہم کرنے کی کوشش کرے۔

اوپن ہاؤس کے دوران ہونے والی بامقصد گفتگو، تجرباتی سرگرمیوں اور تخلیقی اظہار کے ذریعے طلبہ کو یہ سمجھنے کا موقع ملا کہ نفسیات صرف کتابوں اور کلاس روم تک محدود علم نہیں بلکہ انسانی رویوں، جذبات، تعلقات اور معاشرتی زندگی کو بہتر بنانے میں اہم کردار ادا کرنے والا شعبہ ہے۔ شرکاء نے مختلف سرگرمیوں کے ذریعے نفسیاتی تصورات کو عملی زندگی سے جوڑا جبکہ جیمِنگ، کامیڈی اور دیگر تخلیقی سرگرمیوں نے تقریب کو مزید دلچسپ اور یادگار بنا دیا۔

تقریب کے منتظمین نے کہا کہ ’’اوپن سینیگنیشن‘‘ کا بنیادی مقصد نوجوانوں میں ذہنی صحت کے حوالے سے شعور پیدا کرنا، جذباتی استحکام اور مثبت طرزِ فکر کو فروغ دینا اور انہیں ایک صحت مند، مضبوط اور باہمی تعاون پر مبنی معاشرے کی تشکیل کے لیے تیار کرنا ہے۔ انہوں نے کہا کہ یونیورسٹیوں میں ایسی علمی اور تخلیقی سرگرمیوں کا انعقاد طلبہ کی تعلیمی صلاحیتوں کے ساتھ ساتھ ان کی سماجی، جذباتی اور تخلیقی صلاحیتوں کو نکھارنے میں بھی اہم کردار ادا کرتا ہے۔