سی ٹی ڈی اسلام آباد میں خصوصی تربیتی کورسز مکمل کرنے والے افسران و جوانوں میں اسناد، میڈلز اور انعامات تقسیم

جمعرات 27 اگست 2026 20:35

اسلام آباد (اُردو پوائنٹ اخبارتازہ ترین - این این آئی۔ 27 اگست2026ء) سی ٹی ڈی اسلام آباد میں خصوصی تربیتی کورسز مکمل کرنے والے افسران و جوانوں میں اسناد، میڈلز اور انعامات تقسیم کردیئے گئے۔تفصیلات کے مطابق کائونٹر ٹیررازم ڈیپارٹمنٹ کمپلیکس اسلام آباد میں بیسک سنائپر کورس، اینٹی ٹیررسٹ ٹریننگ اور کلوز پروٹیکشن کورسزکی کامیاب تکمیل کے موقع پر تقریب کا انعقاد کیا گیا، جس میں تربیتی کورسز مکمل کرنے والے افسران و جوانوں کی پیشہ ورانہ صلاحیتوں کو سراہا گیا۔

تقریب میں ایس ایس پی سی ٹی ڈی سعود خان نے خصوصی تربیتی کورسز کامیابی سے مکمل کرنے والے افسران و جوانوں میں اسناد تقسیم کیں، جبکہ کورسز کے دوران نمایاں کارکردگی کا مظاہرہ کرنے والے افسران و جوانوں کو میڈلز اور انعامات سے بھی نوازا گیا۔

(جاری ہے)

اس موقع پر ایس ایس پی سی ٹی ڈی سعود خان نے تربیت حاصل کرنے والے افسران و جوانوں کی محنت، نظم و ضبط اور پیشہ ورانہ صلاحیتوں کو سراہتے ہوئے کہا کہ جدید تربیت پولیس افسران کی عملی استعدادِ کار میں اضافے اور بدلتے ہوئے سکیورٹی چیلنجز سے مؤثر انداز میں نمٹنے کے لیے انتہائی اہم ہے۔

انہوں نے افسران و جوانوں پر زور دیا کہ وہ دورانِ تربیت حاصل کی گئی مہارتوں کو عملی فرائض میں مؤثر انداز میں بروئے کار لائیں اور مزید محنت، فرض شناسی، نظم و ضبط اور پیشہ ورانہ لگن کے ساتھ اپنی ذمہ داریاں انجام دیں۔ایس ایس پی سی ٹی ڈی نے مزید کہا کہ اسلام آباد پولیس کی پیشہ ورانہ استعدادِ کار میں اضافے اور اہلکاروں کو جدید تقاضوں سے ہم آہنگ تربیت کی فراہمی کا سلسلہ جاری رکھا جائے گاتاکہ شہریوں کے تحفظ، دہشت گردی کے سدباب اور سکیورٹی کے فرائض کو مزید مؤثر انداز میں انجام دیا جا سکے۔