کامسیٹس یونیورسٹی اور پی پی آر اے کے اشتراک سے پانچ روزہ تربیتی پروگرام کا آغاز

پیر 31 اگست 2026 22:20

اسلام آباد (اُردو پوائنٹ اخبارتازہ ترین - اے پی پی۔ 31 اگست2026ء) کامسیٹس یونیورسٹی اسلام آباد اور پبلک پروکیورمنٹ ریگولیٹری اتھارٹی (پی پی آر اے) کے اشتراک سے ’’پروفیشنل سرٹیفکیٹ اِن پروکیورمنٹ اینڈ کنٹریکٹ مینجمنٹ‘‘ کے عنوان سے پانچ روزہ تربیتی پروگرام کا آغاز پیر کو کامسیٹس یونیورسٹی اسلام آباد کیمپس میں ہوگیا۔ پانچ روزہ تربیتی پروگرام 4 ستمبر 2026 تک جاری رہے گا جس میں سرکاری و نجی شعبے کے مختلف اداروں سے تعلق رکھنے والے 36 شرکاء شرکت کر رہے ہیں۔

افتتاحی تقریب سے خطاب کرتے ہوئے پی پی آر اے کے سینئر سپیشلسٹ عتیق سلطان راجہ نے خریداری کے عمل میں معیاری، شفاف اور مؤثر طریقہ کار اپنانے کی اہمیت پر زور دیا۔ انہوں نے کہا کہ ڈیجیٹل طرز حکمرانی کے پلیٹ فارمز خریداری کے نظام کو مزید مضبوط، شفاف اور مؤثر بنانے میں اہم کردار ادا کر رہے ہیں۔

(جاری ہے)

کامسیٹس یونیورسٹی اسلام آباد کے رجسٹرار ڈاکٹر فہیم اشرف قریشی نے ادارہ جاتی ترقی، اچھی حکمرانی اور قومی اداروں میں پیشہ وارانہ استعداد کار بڑھانے کے لئے یونیورسٹی کے عزم کا اعادہ کیا۔

تربیتی پروگرام کا بنیادی مقصد متعلقہ شعبوں سے وابستہ پیشہ ور افراد کو خریداری کے قانونی و ضابطہ جاتی فریم ورک، قانونی تقاضوں کی پاسداری، معاہدہ جات کے انتظام اور جدید ڈیجیٹل ذرائع سے متعلق عملی معلومات اور ضروری مہارتیں فراہم کرنا ہے۔پروگرام کے دوران ای-پیڈز 2.0 سمیت جدید ڈیجیٹل آلات کے استعمال، شفافیت، کارکردگی اور احتساب کے فروغ پر خصوصی توجہ دی جائے گی۔

پانچ روزہ تربیتی پروگرام کے تحت 17 جامع نشستیں منعقد ہوں گی جن کے دوران مجموعی طور پر 24 گھنٹے کی تدریسی تربیت فراہم کی جائے گی۔ نصاب میں معیاری بولی دستاویزات، بین الاقوامی تجارتی شرائط (انکوٹرمز)، مشاورتی خدمات سے متعلق قواعد و ضوابط، اثاثہ جات کی تلفی، معاہدہ جات کا انتظام اور ای۔پیڈز 2.0 سمیت خریداری اور معاہدہ جات کے انتظام سے متعلق اہم موضوعات شامل ہیں۔