فائر سیفٹی اور طبی امداد کی تربیت وقت کی اہم ضرورت ہے، پروفیسر محمد سلیم مغل

وفاقی شہری دفاع کے مفت تربیتی کورسز میں اضافہ، 100 سے زائد فائر فائٹرز نے تربیت مکمل کرلی

اتوار 13 ستمبر 2026 14:00

کراچی (اُردو پوائنٹ اخبارتازہ ترین - این این آئی۔ 13 ستمبر2026ء) پروفیسر محمد سلیم مغل نے کہا ہے کہ موجودہ حالات میں فائر سیفٹی، طبی امداد اور ہنگامی حالات سے نمٹنے کی تربیت وقت کی اہم ضرورت ہے، شہریوں کو ہنگامی صورتحال سے نمٹنے کے لیے زیادہ سے زیادہ تربیت فراہم کی جانی چاہیے۔ان خیالات کا اظہار انہوں نے فیڈرل سول ڈیفنس ٹریننگ اسکول گلشن اقبال میں فائر فائٹر حصہ اول، کورس نمبر 180 کی اختتامی تقریب سے خطاب کرتے ہوئے کیا۔

تقریب میں 100 سے زائد تربیت یافتہ فائر فائٹرز، انسٹرکٹرز، تربیتی عملے اور دیگر معزز شخصیات نے شرکت کی۔پروفیسر محمد سلیم مغل نے کامیاب شرکاء کو مبارکباد دیتے ہوئے کہا کہ وہ مزید تربیتی کورسز مکمل کریں اور انسانی جانوں کے تحفظ اور معاشرے کی خدمت میں اپنا کردار ادا کریں۔

(جاری ہے)

انہوں نے کہا کہ ان کے برنز وارڈ ادارے کے دروازے فیڈرل سول ڈیفنس ٹریننگ اسکول کے طلبہ و طالبات کے لیے ہمیشہ کھلے ہیں۔

کمانڈنٹ محبوب علی شیخ نے کہا کہ موجودہ حالات کے پیش نظر فائر فائٹنگ، امدادی کارروائیوں اور ابتدائی طبی امداد کی تربیت کی اہمیت مزید بڑھ گئی ہے۔ انہوں نے بتایا کہ فیڈرل سول ڈیفنس ٹریننگ اسکول میں مختلف تربیتی کورسز مفت کرائے جا رہے ہیں جبکہ شہریوں میں حفاظتی شعور اور محفوظ معاشرے کے فروغ کے لیے تربیتی کورسز میں مزید اضافہ کیا گیا ہے۔تقریب کے اختتام پر کامیاب شرکاء میں اسناد تقسیم کی گئیں، جبکہ کمانڈنٹ محبوب علی شیخ نے مہمان خصوصی پروفیسر محمد سلیم مغل کو یادگاری شیلڈ پیش کی۔ تقریب میں سابق کمانڈنٹ عارف معین اور سرفراز حسین جعفری سمیت دیگر افراد نے بھی شرکت کی۔