زرعی یونیورسٹی فیصل آبادمیں نئے داخل ہونے والے طلبہ کے لئے استقبالیہ تقریب

جمعرات 1 اکتوبر 2026 18:22

فیصل آباد (اُردو پوائنٹ اخبارتازہ ترین - اے پی پی۔ 01 اکتوبر2026ء) زرعی یونیورسٹی فیصل آباد کی ایگرین سوسائٹی کے زیر اہتمام نئے داخل ہونے والے طلبہ کے لئے استقبالیہ تقریب کا انعقاد کیا گیا۔ ایگرین سوسائٹی کے عہدیداروں نے طلبہ کو سوسائٹی کے پروگراموں اور یونیورسٹی میں منعقد ہونے والی مختلف سرگرمیوں کے بارے میں آگاہ کیا۔ ڈین کلیہ زراعت ڈاکٹر غلام مرتضیٰ نے نئے طلبہ کا خیرمقدم کرتے ہوئے انہیں نصابی اور ہم نصابی سرگرمیوں میں بھرپور حصہ لینے کی تلقین کی۔

انہوں نے کہا کہ یونیورسٹی کی زندگی طلبہ کی شخصیت سازی کے ساتھ ساتھ مثبت تعلقات استوار کرنے کے قیمتی مواقع فراہم کرتی ہے۔ ڈائریکٹر امور طلبہ ڈاکٹر وسیم اکرم نے طلبہ کو یونیورسٹی میں قیام کے دوران لاگو قواعد و ضوابط سے آگاہ کیا۔

(جاری ہے)

انہوں نے طلبہ پر زور دیا کہ وہ نظم و ضبط کا مظاہرہ کریں، یونیورسٹی کی پالیسیوں کا احترام کریں اور اپنے تعلیمی سفر کے دوران ذمہ دارانہ طرزِ عمل اپنائیں۔

چیف ہال وارڈن ڈاکٹر حمیرا رزاق نے طلبہ کو ہاسٹلز میں دستیاب رہائشی سہولیات کے بارے میں بتایا۔ انہوں نے ہاسٹل میں مقیم طلبہ کو فراہم کی جانے والی سہولیات پر روشنی ڈالتے ہوئے حال ہی میں متعارف کرائی گئی آن لائن ہاسٹل بکنگ سروس سے بھی آگاہ کیا، جس کا مقصد رہائش کے حصول کے عمل کو مزید آسان بنانا ہے۔ تقریب کے دوران زرعی یونیورسٹی فیصل آباد سپورٹس گالا میں نمایاں کارکردگی کا مظاہرہ کرنے والے کھلاڑیوں میں اسناد بھی تقسیم کی گئیں۔ تقریب میں ڈاکٹر ندیم عباس، ڈاکٹر فاطمہ عثمان اور دیگر اہم شخصیات نے بھی شرکت کی۔