ماہ بعد تفریحی مقام ناران کو سیاحوں کیلئے کھول دیا گیا

مانسہرہ (اُردو پوائنٹ اخبارتازہ ترین - این این آئی۔ 16 مئی2024ء)ضلع مانسہرہ میں 6 ماہ کی طویل بندش کے بعد تمام رکاوٹیں دور کرکے تفریحی مقام ناران کو سیاحوں کیلئے کھول دیا گیا ہے۔ڈپٹی کمشنر مانسہرہ عدنان خان کے مطابق سیاحوں کے لیے ناران تک شاہراہ کو کھول دیا گیا ہے جبکہ جھیل سیف الملوک اور بٹہ کنڈی وبابو سرٹاپ کو کھولنے کے لیے صفائی کا کام تیزی سے جاری ہے۔

(جاری ہے)

ٹورازم پروموشن ایسوسی ایشن آف کاغان کے چیئرمین سیٹھ مطیع اللہ نے سیاحوں کو ناران آنے کی دعوت دیتے ہوئے کہا کہ ہمارا روڈ 6 مہینے کے بعد کھلا ہے، ہم اللہ کا شکر ادا کرتے ہیں کہ اس وقت سارے گلیشیئر کلیئر ہوگئے ہیں اس حوالے سے مقامی افراد نے بتایا کہ مئی کے مہینے میں غیر متوقع برفباری نے ناران کے تصویری حسن کو دوبالا کردیا ہے ،انتظامیہ نے سیاحوں کو ٹراؤٹ کے شکار کی اجازت بھی دے دی ہے۔مقامی رہائشی حسن دین نے کہاکہ آج کل ہر طرف برف ہی برف ہے اور خوب ٹھنڈ ہے تمام سیاح اس سے فائدہ اٹھائیں اورآکر برف کی سیر انجوائے کریں۔اس کے علاوہ ناران کے جو ریسٹورنٹ ہیں انہوں نے سیاحوں کے لیے نئی ڈشز تیارکی ہیں، اس سردی میں گرما گرم پکوان کھا کر خوب لطف اندوز ہوں۔