شہنشاہ غزل مہدی حسن کی 98 و اں یوم پیدائش منایا گیا

لاہور (اُردو پوائنٹ اخبارتازہ ترین - اے پی پی۔ 18 جولائی2025ء) شہنشاہ غزل مہدی حسن کی 98 واں یوم پیدائش 18 جولائی بروز جمعہ کو منایا گیا۔مہدی حسن 18 جولائی 1927 کو بھارت کی ریاست راجستھان کے گائوں لونا میں پیدا ہوئے، ان کی ابتدائی تربیت گھر ہی میں ہوئی، خود ان کے بقول وہ کلاونت گھرانے کی سولہویں پیڑھی سے تعلق رکھتے تھے۔

(جاری ہے)

انہوں نے موسیقی کی تربیت اپنے والد استاد عظیم خان اور اپنے چچا استاد اسماعیل خان سے حاصل کی، 1947 میں مہدی حسن اپنے اہل خانہ کے ساتھ پاکستان آ گئے، ان کی گائی ہوئی غزلیں اور گیت پاکستان اور بھارت سمیت دنیابھرمیںآج بھی کانوں میں رس گھولتی ہیں اور بے حد مقبول ہیں،مہدی حسن کم عمری میں ہی ٹھمری، درپت، خیال اور دادرا سمیت کئی راگوں میں پختہ ہو گئے، 8 سال کی عمر میں مہاراجہ گوالیار کے دربار میں فن کا مظاہرہ کیا،انہوںنے 25 ہزار سے زائد فلمی و غیر فلمی گیت اور غزلیں گائیں، انہیں حکومت کی جانب سے تمغہ امتیاز، ستارہ امتیاز اور پرائیڈ آف پرفارمنس جیسے اعزازات سے بھی نوازا گیا، 1966 میں صدر ایوب خان نے مہدی حسن کو شہنشاہِ غزل کا خطاب دیا۔

1979 میں مہدی حسن کو بھارتی سرکار نے اپنے سب سے بڑے کے ایل سہگل ایوراڈ سے بھی نوازا۔ استاد مہدی حسن 13 جون 2012 کو 84 سال کی عمر میں اپنے خالق حقیقی سے جا ملے۔