پی ٹی آئی اقتدار ختم ہوتے ہی ختم ہو جائیگی ، حاجی عبدالمجید

کراچی (اُردو پوائنٹ اخبارتازہ ترین - این این آئی۔ 21 ستمبر2021ء)پاکستان پیپلز پارٹی سندھ کونسل کے رکن حاجی عبد المجید نے کہا ہے کہ پیپلز پارٹی واحد جماعت ہے جو عوام کے دلوں میں بستی ہے اور ملک و عوام کی ترقی و فلاح و بہبودکے لیے کام کرتی ہے ۔اس کے برعکس دیگر جماعتیں موسمی پارٹیاں ہیں جو اچانک نمو دار ہوتی ہیں اور پھر بلوں میں چلی جاتی ہیں۔

وہ لیاری کے مختلف علاقوں میں عوامی رابطہ کے دوران علاقہ مکینوں اور پارٹی کارکنان سے گفتگو کر رہے تھے۔ پی پی پی رہنماء حاجی عبدالمجید نے کہا کہ آئندہ انتخابات میں پیپلز پارٹی ایک مرتبہ پھر بھر پور کامیابی کا لوہا منوائے گی۔ کیونکہ پیپلز پارٹی نے عوام کی خدمت کی ہے۔ دوسری جانب کئی پارٹیاں دن بدن اپنا وجود کھوتی جا رہی ہیں وہ خواہ مسلم لیگ (ن) کی شکل میں ہوں یا ایم کیو ایم کی شکل میں ہوں دونوں جماعتوں کے قائد ملک سے بھاگ کر بیرون ملک منہ چھپائے ہوئے ہیں اور عوام کو منہ دکھانے کے قابل بھی نہیں ہیں۔

(جاری ہے)

جبکہ حکمران جماعت پی ٹی آئی وقتی پارٹی ہے اقتدار ختم ہوتے ہی پی ٹی آئی کا وجود بھی خود بہ خود ختم ہو جائے گا ۔پی پی پی سندھ کونسل کے رکن حاجی عبد المجید نے علاقہ مکینوں پر زور دیا کہ وہ اپنے مسائل کے حل کے لیے پیپلز پارٹی کے ہاتھ مضبوط کریں اور پارٹی کارکنان اپنے اندر اتحاد اور جوش جذبہ برقرار رکھیں ۔ پیپلز پارٹی لیاری سمیت کراچی کے ہر علاقے کی ترقی کے لیے کام کرتی رہے گی۔

Your Thoughts and Comments