پنجاب میں بیس کروڑ روپے کی لاگت سے فیکلٹی ڈویلپمنٹ پروگرام کا آغاز ہو گیا،

پروگرام کے تحت استعداد کار میں اضافے کیلئے لیکچررز کو برطانیہ اور نیوزی لینڈ بھجوایا جائیگا،رانا مشہود احمد

جمعہ 29 اگست 2014 19:19

لاہور ( اُردو پوائنٹ اخبار تازہ ترین۔29اگست۔2014ء) وزیر تعلیم وقانون پنجاب رانا مشہود احمد خاں نے فیکلٹی ڈویلپمنٹ پروگرام کے تحت سکالر شپ حاصل کرنے والے آٹھ اساتذہ کرام کے اعزاز میں استقبالیہ دیا جو اپنے اپنے شعبے میں بیرون ملک مزید تعلیم کے لئے منتخب کئے گئے ہیں۔اس موقع پر وزیرتعلیم پنجاب نے بتایا کہ ہائر ایجوکیشن ڈیپارٹمنٹ پنجاب نے وزیراعلی محمد شہباز شریف کی خصوصی ہدایات پر فیکلٹی ڈویلپمنٹ پروگرام کے لئے بیس کروڑ روپے جاری کئے ہیں۔

برٹش کونسل کے تکنیکی تعاون سے شروع کئے گئے اس پروگرام کے تحت اپنے اپنے تعلیمی ادارے میں نمایاں کارکردگی کے معیار پرپورا اترنے والے سولہ لیکچررز کو سال میں دو مرتبہ جنوری اور ستمبر میں بیرون ملک بھجوایا جائے گا۔

(جاری ہے)

ہر سال صوبے کے مختلف مفصل کالجوں میں تعینات آٹھ لیکچررز کو برطانیہ جبکہ آٹھ لیکچررز کو نیوزی لینڈ کی مختلف یونیورسٹیوں میں مزید تعلیم کے لئے بھجوایا جائے گا تاکہ ان اساتذہ کی استعداد کار میں اضافہ ہو سکے۔

اس سال برطانیہ روانہ ہونے والے آٹھ لیکچررز میں چار خواتین اور چار مرد لیکچررز شامل ہیں جنہیں کوئین میری یونیورسٹی آف لندن،یونیورسٹی آف مانچسٹر،یونیورسٹی آف برسٹل،یونیورسٹی آف سرے اور یونیورسٹی آف کنٹربری برطانیہ میں ماسٹر ڈگری کورسزکروائے جارہے ہیں۔رانا مشہود احمد خاں نے کہا کہ ہائر ایجوکیشن کے شعبہ میں برٹش کونسل کے فنی تعاون سے اس پروگرام کو آگے بڑھانے کا مقصد مختلف شعبوں میں مستقبل کے قائدین تیار کرنا ہے۔ برٹش کونسل پاکستان کی ڈائریکٹر ایجوکیشن مس نشاط ریاض،پارلیمانی سیکرٹری ہائر ایجوکیشن پنجاب محترمہ مہوش سلطانہ اور پروگرام کے دیگر کوآرڈی نیٹرز نے بھی تقریب میں شرکت کی۔