پنجاب یونیورسٹی کے زیر اہتمام سیلاب زدگان کے لئے فنڈ ریزنگ

جمعرات 11 دسمبر 2014 23:11

لاہور (اُردو پوائنٹ اخبار تازہ ترین۔11دسمبر 2014ء) پنجاب یونیورسٹی انسٹی ٹیوٹ آف کیمیکل انجیئنرنگ اینڈ ٹیکنالوجی کے زیر اہتمام سیلاب زدگان کے لئے دوروزہ فنڈ ریزنگ ، سی وی رائنٹنگ، جاب ہنٹنگ اور انٹرویو سکلز کے متعلق تقریب کا انعقاد کیا گیا۔ اس موقع پر انسٹی ٹیوٹ کے ڈائریکٹر پروفیسر ڈاکٹر عامر اعجاز، سنٹر فار کول ٹیکنالوجی ڈائریکٹر اور کنٹرولر امتحانات پروفیسر ڈاکٹر شاہد منیر، چیئرمین شعبہ آئی ای آرپروفیسر ڈاکٹر عابد چوہدری، دیگر فیکلٹی ممبران اور طلبہ نے شرکت کی۔

اپنے خطاب میں ڈاکٹر عامر اعجاز نے بہترین تقریب کے انعقاد پر اسسٹنٹ پروفیسر مدثر اعظم کی کاوش کو سراہتے ہوئے کہا کہ اس سے طلبہ کو صنعتوں کے معیار مطابق ڈھالنے میں مدد ملے گی۔ ڈاکٹر شاہد منیر نے کہا کہ ہم پنجاب یونیورسٹی کے سفیر ہیں اور جس کی عزت و توقیر میں اضافہ کے لئے ہمیں مزید کام کرنا ہوگا۔

(جاری ہے)

ڈاکٹر عابد چوہدری نے کہا کہ ایسی سرگرمیوں سے طلبہ میں ایسی پیشہ ورانہ صلاحتیں اجاگر ہوتی ہیں جنہیں عام طور پر تعلیمی نظام میں نظر انداز کیا جاتا ہے۔

اس موقع پر سیلاب زدگان کے لئے 1لاکھ روپے فنڈ اکٹھا کیا گیا جبکہ اس سے پہلے بھی انسٹی ٹیوٹ آف ایگریکلچرل سائنسز اور مائیکروبائیولوجی اینڈ مالیکیولر جنیٹکس میں بھی فنڈ ریزنگ کی جا چکی ہے۔ مدثر اعظم پنجاب یونیورسٹی کے مختلف شعبہ جات میں سیلاب متاثرین کے لئے فنڈ ریزنگ کے مزید پروگرام منعقد کروائیں گے۔