پنگریو،45 ایکڑ زرعی زمین کی ملکیت کے معاملے پر دو گروپوں کے درمیان تنازعہ شدت اختیار کر گیا

پنگریو ( اُردو پوائنٹ تازہ ترین اخبار۔ 19 دسمبر 2014ء) پنگریو کے قریب دیہہ فراؤ میں45 ایکڑ زرعی زمین کی ملکیت کے معاملے پر دو گروپوں کے درمیان تنازعہ شدت اختیار کر گیا ہے اور دونوں گروپوں مورچہ بند ہو کر ایک دوسرے پر فائرنگ کر رہے ہیں زبردست فائرنگ کے باعث پورے علاقے میں شدید خوف وحراس پھیل گیا ہے فائرنگ کے نتیجے میں ایک شخص زخمی ہو گیا جبکہ ایک گروپ نے مخالف گروپ پر دکانوں سے لوٹ مار کر نے کا بھی الزام عائد کیا ہے تفصیلات کے مطابق دیہہ فراؤ میں45 ایکڑ زرعی اراضی کی ملکیت کے معاملے پر حاجی شمشاد راجپوت اور خان محمد عرف خانو پٹھان کے گروپوں کے درمیان تنازعہ مسلح تصادم میں تبدیل ہو گیا ہے اور زمین پر قبضہ کر نے کے لئے دونوں گروپ مورچہ بند ہو گئے ہیں اور زبردست فائرنگ کا تبادلہ جاری ہے اس ضمن میں حاجی شمشاد راجپوت اور ان کے بیٹے شہزاد علی راجپوت نے پنگریو کے صحافیوں کو بتایا کہ یہ زمین ان کی ملکیت ہے سارا علاقہ اس کا گواہ ہے مگر خان محمد عرف خانو پٹھان زبردستی اس پر قبضہ کرنا چاہتا ہے گزشتہ روز خان محمد گروپ نے ہماری زمین پر مسلح افراد کے ساتھ چڑھائی کی اور شدید فائرنگ کر کے پورے علاقے میں دہشت پھیلانے کے بعد زمین پر قائم ہماری دکانوں سے لوٹ مار کی گئی فائرنگ سے ہمارا ایک ہاری زخمی بھی ہوا ہے ہم نے صدر پولیس اسٹیشن پنگریو، حیات خاصخیلی پولیس پوسٹ کے انچارج کے علاوہ ایس ایس پی بدین، ڈی آئی جی حیدر آباد ، آئی جی سندھ، وزیر اعلیٰ سندھ سمیت تمام اعلیٰ حکام کو خان محمد پٹھان کی جانب سے ہماری زمین پر قبضے کی کوشش، دکانوں سے لوٹ مار اور ہمیں جان سے مارنے کی کوشش کے بارے میں آگاہی دے کر اپنے تحفظ کی اپیل کی ہے مگر اب تک کسی حکام یا ادارے نے ہماری درخواستوں پر غور نہیں کیا اور خان محمد پٹھان کے خلاف کاروائی نہیں کی جس کی وجہ سے ہماری جانوں کو سنگین خطرات لاحق ہو گئے ہیں انہوں نے الزام عائد کیا کہ خان محمد پٹھان پنگریو پولیس پر حملے سمیت جرائم کی سنگین وارداتوں میں ملوث ہے اور اب بھی اس کے ڈیرے پر جرائم پیشہ افراد بڑی تعداد میں مقیم ہیں جو کہ اس کے ساتھ مل کر ہماری زمین پر قبضے کی کوشش کر رہے ہیں پولیس اور دیگر ادارے اس حوالے سے باخبر ہو نے کے باوجود خاموش تماشائی بنے ہوئے ہیں جس کی وجہ سے یہ جرائم پیشہ افراد کسی بھی وقت ہمیں اور ہمارے ہاریوں کو جانی اور مالی نقصان پہنچا سکتے ہیں حاجی شمشاد راجپوت اور شہزاد علی راجپوت نے اس حوالے سے نوٹس لینے اور اپنے تحفظ کی اپیل کی ہے